Ki Kickboxer ka Meghalaya da yoh ki wow khur 5 tylli ki takma ha ka WAKO India National Seniors & Masters Kickboxing Championship 2023 wa da pynman ha Lovely Professional University, Jalandhar, Punjab nadooh ka 1 tarik hadooh ka 5 tarik uni u bnai.
Na ki 5 tylli ki takma wa yoh, 2 tylli toh ki takma ksiar, 2 tylli ki takma rupa wa kawi ka takma tama wei 4 ngut na kiwa yoh takma toh kiwa na Shangpung, West Jaiñtia Hills.
Ya ki takma ksiar da yoh u Teimiki Sungoh (Full Contact Men- 57 Kg) uwa na Shangpung Mission, West Jaiñtia Hills District waka Sweety Kumari Thakur (Kick Light Women-40 Kg) kawa na Shangpung Moosyiem, West Jaiñtia Hills District.
Ya ki takma rupa da yoh ka Anjelin Iakai (Light Contact Women-50 Kg) kawa na Shangpung Khliehmushut, West Jaiñtia Hills District waka Banisha Suiam (Light Contact Women-55 Kg) kawa na Shangpung Pohshnong, West Jaiñtia Hills District.
Ya ka takma tama da yoh da u Kynsaibor Wahlang (Full Contact Men-51 Kg) uwa na Mawkyrwat, South West Khasi Hills District.
Waroh kiwa na Meghalaya kiwa da lai chimbynta da em ki 20 ngut.
Neiliang ka Meghalaya State Kickboxing Association da pyntip ko wa ka nadooh u Naisaphra u 2017 hadooh kattæ kiwa yalehke yong ka da yoh ki kattu la 70 tylli ki takma ksiar, 47 tylli ki takma rupa wa 68 tylli ki takma tama iwa da poi waroh 185 tylli ki takma.
