Ynne ka sngi Musiang kawa man ka sngi wa le yong ka lehniam Behdieñkhlam ki khon ka Raij Jowai da man ko kawa lai bait heiwa kiwa kitkaam niam da pynman ki yei yachem ha Mynkoipyrdi, Loompyrdi Iongpiah heiwa da wan chimbynta da ki kattu katni ngut kiwa chah jied na ki Kmairaij (dorbar chnong) chirup wa ki heh yong ka Seiñ Raij heiwa da yoh i klam na u President ka Seiñraij, u OR Challam wa ki kyntien na u Dolloi ka Elaka, u Puramon Kynjing.
Manda kut ka yalang da lai ki cha Iawmusiang wow rah ya ki Dieñkhlam heiwa da chaad leh ha waroh ki thaw lehniam ka Raij kam ha Biar ka Blai, ha Datlawakor wa kiwi kiwi ki thaw deiwa chimbynta da ki phaw hajar ngut ki khon ka Raij Jowai.
Hadien wa da pynpoi ya ki Dieñkhlam ha Madansiatthong, ki Khonraij da lai li thooh ki ya ka Khnong Blai na Loom Sooiung yow rah ya ka cha Madan Poh-Sawiar.
Manda poi ha Madan Poh-Sawiar u Dolloi da e u yei ngooh i dem wei da e kti u yei pyrnah Khnong Blai ha u Kñi ka kur Nikhla wow e u ka ngooh ka dem wa ka suit ka choor ha ka Khnong Blai yow e ngooh ya ki Blai ki Syiem wei manda dep neini ki Khon ka Raij da rah ki jar jiar ki Dieñkhlam.
Ki khon ka Raij da rah ki ya ki Dieñkhlam nadooh na Madansiatthong, ha Biar ka Blai hadien wa chaad neini da rah ya ki Dieñkhlam hadooh wa poi jar jiar ki chnong yong ki yow pynyieñ ya ki Dieñkhlam.
Ki Khonraij da rah won ki ya ka Khnong Blai wow pynpoi ya ka ha Madan Moosyiem, wa em haphrang ka Yungwalieh ka Chilliangraij.
