Ha ka 8 tarik uni u bnai, ka Orphan Children Foundation (OFC) hapoh i yahkhmat uwa seiñ uwa man leh kam u Founder Chairman, u L. Dkhar da lai e yarap ki ya ki khynnah khonswet wa kiwa em i duna hei doh i pran namo kiwa man kyrpang heiwa da lai e yarap da ki marbaam wei yeini da leh ha chnong Saphai, West Jaiñtia Hills.
Ha kani ka sngi da pynlai ya ka yalang wa khian da u W. Kanai, Secretary Chnong Saphai wei da yoh leh yei klam wa tbian na ka M. Bareh, Office Secretary ka Orphan Children Foundation, West Jaiñtia Hills District wei da em leh ki kattu katni ngut ki Volunteer yong ka Orphan Children Foundation, West Jaiñtia Hills.
Neiliang u L. Dkhar hawa e yei klam da kyntu u ya kiwa ri wa sumaar ya ki khynnah wa sah khonswet wym toh u leh chiliang ki wei da kyntu u leh wa lada maad ki ya iwon iwon i eh wow pyntip cha ki Volunteer yong ka Orphan Children Foundation khnang wow ye ki u yarap wei da ong u leh wa ka Foundation ye ko wow yarap marbaam wa ka bai skur kamjooh leh heipor wa kjut wa chitom ki khynnah wa sah khonswet wa kiwa em i duna ha i doh i pran wei da kitbok kitwiang u leh ya kini ki khynnah wow yoh ki yei doh i phad wa chait wa khiah yow nang ku ki chakhmat ha ka puræ puthi.
