Ka Dorbar Chnong Nartiang waka Dong Lummajar Club Nartiang deiwa ya krehlang waka Forest Department da pynman yei pynsñiawthooh hajrong ka Van Mahotsav hapoh Community Hall ka chnong haka 8 tarik uni u bnai wei hadein ka yalang da pynman leh yei thung dieñ ha Khnap Thang Bru.
Ya kani ka yalang da pynlai da u waheh chnong ka Nartiang, u Mom Phalangki heiwa da yoh yei klam pdiang burom na u Secretary ka Dong Lummajar Club Nartiang, u Yiang Maskut uwa da pdiang sñiawbha ya ki wakreh ka chnat Forest, ki khynnah skur yong ka Ramakrishna Mission Secondary School, Nartiang kamjooh ya ki paidbah waroh deiwa ban joor yei emkaam u pynneh pynsah ya ki khloo ki kjam.
Da yoh leh yei klam phang pyrdi na u P. Rymbai, Fr-I Forestry uwa da snieñ kyntu ya ka chnong heiyatoh wa kani ka sngi wa da leh yaka man-u-snem ha ka tayaaw wa nongkong yong u Naiynru deiwa thung ya ki dieñ tangwa emkaam won sumaar u pynkhooid ya ki man-i-por yow pynyoh nong ki ya i kam kiwa chong chnong.
Da e khublei u ya ki khynnah skur yong ka R.K. Mission Secondary School, Nartiang wei da sñien da kyntu u ya ki toh u man ki ki khynnah wa emburom emakor wym hoi u man ki khynnah dakait yow lait ka skur u dooh burom.
Neiliang won u S. Bhoi, Principal R.K. Mission Secondary School, Nartiang da e u yei yaroh ya ka Forest Department wa da pynyoh ko ya ki tre dieñ kseh wow thung wei ini man ko kawa sah kymmoo ya ka chnong heijooh i por yow suk ka pateiñ yong ka chnong khamtam ha ka imlang sahlang wei da ong u leh ha ki snem 1980 hadooh 1994-95 ka chnat Forest da e ko chiboon i yarap ya ki bru cha kani ka thaaiñ deiwa thung ya ki dieñ ha ki thaw yong ka chnong wa ha ki thaw yong ki bru samen.
U P. Pashiang, Range Officer da e yaroh u ya ka chnong Nartiang, wa da pdiang ko u pynman ya kani ka yalang wa pynman daka Forest Department kawa phooh wa phieñ nadooh Community Hall hadooh ha loom ha i thaw thung ya ki deiñ deiwa ya krehlang ki paidbah ryngkat i emlang ki khynnah skur, da ong u leh wa emkaam u pynsñiawthooh chwa ya ki paidbah kat wym pu sñiawthooh yei emkaam u thung ya ki dieñ kat da kamtæ da pynman ya kani ka Van Mahotsav yoh ki bru u chim yei kitkhlieh, tangwa ha u Naiynru da pynman ya ka World Environment Day kamtæ da pynpyrkhat ya ka sorkar wa emkaam chooh chooh sa ha ka tayaaw wa nongkong u Naiynñiaw kam ka sngi wa kyrpang chisien chi snem ha waroh ka ri India, da ong u leh i stat i tip yong ka pyrthai waroh kawi da chem ki wa ka bei rym-aw daw man ko kawa jæd wa pra, kamtæ emkaam u booh yei pynsñiawthooh cha kiwa chong chnong wa hawa ah dieñ wow sñiawbha u thung ha i thaw wa dep phi u ah wei ini toh iwa hakhmat dooh wa emkaam wow leh neibhah lada ym leh yeini daw booh ko hei maa ya ki sim ki doh, ki mrad ki mreng neibhah wa emkaam i ya ki dieñ neibynta ka baam ka dih, ka laær wa khooid yow man ki khloo ki kjam wa rben wa yirngam.
Neiliang u S. Suwer, Secretary chnong Nartiang da e u ya i kyntien e khublei ya waroh ki paidbah nadooh ki khynnah skur, kiwa sikai khamtam ya ka Forest Department wa da e sñiawbha ki ya ki tre dieñ kseh wa da yoh u thung ha chnong wei da kitbok kitrwiang u ya ki wow nang pynyoh chooh chooh ya kini.
