Wow pynlai chaphrang heiyatoh wa i rai ka sorkar wow pynku ya i puræ puthi ya ki khynnah kiwa poi chaphrang ha ki Board Exam wa pynman da ka MBOSE, da pynkup burom ya ki ha ka ‘Meghalaya Education Symposium’ ha Shillong ynne heiwa neiliang u Montri Rangbah ka jylla u Conrad K Sangma da saam u ya ki khusnaam hei emlang u Montri ka chnat Puræ Puthi, u Rakkam A. Sangma ha ka yalang wa da pynman hapoh Shillong International Centre for Performing Arts and Culture.
Ka ‘Meghalaya Education Symposium’ toh kawi na ki kaam wa ka sorkar jylla sdang ko wow pynku ya i puræ puthi wei ha kani ka sngi da wan chimbynta dai ki Montri sorkar kiwa kynthup ya ka Dr. Mazel Ampareen Lyngdoh, u Paul Lyngdoh deiwa emlang u H.M. Shangpliang, uwa e buit ka chnat Puræ Puthi, u Pravin Bakshi, Commissioner & Secretary ka chnat Puræ Puthi wa kiwi kiwi.
Neiliang u Rakkam A. Sangma da pdiang u yei pynman ya ka “Meghalaya Education Symposium 2023,” deiwa ong wa hapoh i yahkhmat u Conrad Sangma, ka sorkar Meghalaya da kyruiñ ko cha waroh ki kaam pynroi, wei da ong u wa kam ka jylla da lai ko ka luti wow lai chaphrang. Lyngba ini i thmu daw ye u wanrah ya chiboon ki kaam kam ka skurbah, ki College, i pynmiat ya ki skur wa da rim wa kiwi kiwi.
Neiliang u Conrad Sangma hawa e yei klam da ong u wa ka “Meghalaya Education Symposium 2023” man iwa sarong wow pynman deiwa chimbynta nadooh ki Montri, ki heh sorkar, kiwa sikai wa kiwi kiwi weiwa ka sorkar katni yaleh ko iwa bha tam neibynta ki paidbah ym du ha i puræ puthi tangwa ha kiwi ki bynta leh kamjooh.
Da ong u wa da wanrah ya ka Youth Policy wow pynkupbor ya ki khynroo khyllood ka jylla heiwa ka sorkar da chimkhia ko wow pynku ya kamwa 2000 tylli ki skur Lower wa Upper Primary kamjooh i mang tangka wa T. 920 klur da ye u chna ya ki 39 tylli ki Eklavya Model Residential Schools (EMRS) chibynta wow yoh laad ki khynnah yei puræ puthi.
Da kyruiñ u leh cha ki kyrdan puræ wa chajrong deiwa mang neibynta khynde tylli ki College ha waroh kawi ka jylla wow pyntikna wa yoh ki khynnah ya i puræ puthi wa biang ha ki thaaiñ palatsor wei da saam hadooh 26,000 tylli ki Digital Tablet cha ki khynnah ha u snem 2021-22.
Chooh chooh da ong u wa ka sorkar angnood ko wow kynthup ya ki yumut wa i mynjur lyngba i pynman ya ka ‘Education Symposium’ wow pteiñ ya i puræ puthi chajrong.
Khaddooh da e khublei u ya waroh ki khynnah kiwa da poi chakhmat ha ki Exam wa pynman ka Meghalaya Board of School Education wei kyrmen skem u wa i rukom krehkaam ka chnat puræ puthi daw ye u yarap ya ki khynnah har rukom wa ki lain puræ wa kwah ki.
