U Chief Executive Member ka Jaiñtia Hills Autonomous District Council (JHADC), u Thombor Shiwat da pyntip u wa hadooh katni, ka Council ym pu tip ko iyi iyi yei phah thooh wei wow puræ bniah yow wanrah ya ka luti rel cha East Jaiñtia Hills District hadooh Khliehriat.
Hawa klam wa ki kattu katni kiwa thoh khubor ha ha Shillong, u CEM da ong u wa lada em i thmu wa kam ini, ka JHADC da emkaam ko wow chong yaklam sani bha wa ka sorkar jylla wei kamjooh wa waroh kiwa embynta nadooh ki paidbah ka thaaiñ, kiwa yahkhmat chnong wa ki seiñbhalang. Da ong u wa hadien i yaklam wa sani bha daw rai lada man næ ym man wow wanrah ya ka luti rel ha ka thaaiñ, tangwa neiliang u CEM da klam che wa ka Council ym leh ko ya iwon iwon kawa man pyrchah wei khlem sñiawthooh yumut lang.
Neiliang u Thombor da pynsñiaw u deiwa ong wa ya katni ym pu emkaam wow wanrah ya ka luti rel, tangwa da pynrap wa boi deiwa wanrah ya ka luti rel daw em da iwi i kylla wei ya itæ leh ymtip chwa.
Kam wow pynkynmoo wa u Montri Rangbah ka jylla, u Conrad Kongal Sangma da pyntip u wa i puræ bniah da sdang wow pynpoi noh ya ka luti rel cha East Jaiñtia Hills District, tangwa hadien ini i pynbna yong u Montri Rangbah neiliang ki seiñbhalang kiwa em ha ka jylla da pynsñiaw ki yei pyrchah joor wei da dawa ki leh wa ka sorkar toh u pynbiang chwa ko ya ki laad yada kam ka ILP wa kiwi, hadien itæ daw yaklam ya ka luti rel.
