Da: U Wandell Passah, Nongkrem
Ym tip de u ong lada u moochuni wa u mooyong da man u i kyrkhu ya ka East Jaintia næ ym em. Ha u 2001 da e License 10 tylli ki karkhana pynmih khyndawbilat, 5 ha Lymbrum næ ha Lumshnong. Khlem da paan yumut na ka Mawmluh Cherra Cement Ltd kawa nadooh u 1966 ka wow batai katwon emkaam bordiñ kawa poi 118MWh iwa mut chi bnai 118,000 kWh næ 118000 Unit (ha yung Single Phase 400 Unit), neitæ ka Sohra kawa yoh yaka Lafarge kawa kitkhia wow chna skur, Dispensary, umbaam umdih wow yarap ya ki thaw wa da chah ktah.
Ha u 2007 ka wah Lukha ym ye de ko u pynim dakha lait neipor kmai um por lyiur. Sñiawsih wa ka MSPCB yachah liang ko wa ki 5 tylli ki karkhana kiwa pynbaad yei tih mooyong.
Manda pynprum ka Lukha tæ da khyrngiat krih næ. Da khut ki ya u Scientist uwa da chong ngiah yong ka Central Board of Pollution Control Delhi, u D.P. Mukhophadyay wow puræ bniah ya ka wah. Da hiar u na Saipung cha tre wa man ki chka wa ki wah, na khloo ka Lukha jngiar ko. Tangwa manda yachem ko yaka wah Lunar wa tooid lyngba ki 5 tylli ki karkhana wa ki yung chong bru, ka Lukha kylla rong ko.
Related posts
Kani ka Report ymtoh iwa kwah ka sorkar næ ki karkhana u pynyoo, neitæ i daw hadooh katni leh dang kset ha duli.
Hei yong sakhiat toh u pait bniah ki aiñ kam ka EPA 1986 wow puræ lada hoi namo ym hoi u e License. Toh u em ka EIA namo wow pait yeiwa ye u chah ktah kylla iwa mut wow pyndam noh ya ka License næ deiwa pynduna yei ye u pynmih (Production Capacity).
Chish phi, heithaw u leh yeiwa emkaam, ka sorkar dang e License pathan ko ya ka Star Cement wow tih sa 8.2 Km sodong ka Eco Sensitive Zone ka Narpuh Wildlife Sanctuary wei yoh haroh ko u pynemkaam da ki Dynamite wow beh ya ki sim ki mrad kiwa em.
Yeini da leh da ka sorkar Meghalaya hei sñiawthooh wa u Prakash Javedkar uwa da man heitu i por u Union Minister ka MoEFCC. Da mih ki khubor wa ka Star Cement da yoh License ko tangwa kiwi ki khubor da ong wa u Conrad Sangma ymtip u yeini iyi iyi.
Mar yoh License kani, ka MSPCB da phah chithi ko wow paan yumut wa lada hoi namo ym hoi ya ka MeECL wow e ko sa 15MW ka bordiñ ya ka Star Cement wow pynheh yei pynmih khyndaw bilat. Wei kammon da leh yeini hawa hap wow leh Load Shedding katwa ya ka Star Cement da nood wow e bordiñ.
Lada bichaar bha ya u Conrad Sangma nadooh wa da pynbna wa em 34 lak MT u mooyong wa da tih nadooh 2014 u snem wa khang ka NGT wow tih hadooh u 2023, katni lyngba ki High Level wow pynyookwah u yu ki Low Level, neitæ manda ym mankaam i wanrah luti rel ha Byrnihat cha Shillong, sak næ cha Khliehriat wow pynsñiawbha ya ki 5 tylli ki kakrhana pynmih khyndaw bilat wei so ngut ki wow tih mooyong katkam ka juk wa katni, ye u ong wa uni u CM wa ka sorkar khloh ko na kiwa dooh yow psa ya kiwa yoh wa mahajon.
Sñiawngooh ya ka JSU kawa da ong ieh chwa ya kini ki kreh kiwa da ki phaw lak klur tangka. E chwa da ka Civil Hospital kawa ye sakhiat u ong kam ka Civil Hospital, ki skur, ki College wa ka sarok wa miat wa paka ka wym sih kam ha Lumshnong-Ratacherra du chi hiar u slap.
Lada kyruin cha Sutnga heiwa ka Environment Coordination Committee da sñiawsuk ko heipor por klam ka MSPCB kawa da booh 24 tylli ki kyndon kiwa hap u leh wa ki wym toh u leh tangwa ka sorkar won pynsñiawbha ko ya ki nong Rajasthan te mih kitæ ki karkhana Coke wa man pyrchah aiñ kopsar deiwa mut ki wa hawa chet ki ya u mooyong ym mih Carbon Dioxide, mih da ka Oxygen kopsar ka Chemistry thymme kawa ye u yoh Nobel Prize.
Ymtoh du neibynta East Jaiñtia tangwa neibynta waroh ka Khasi Hills wa Jaiñtia Hills. Iwi i yukylli ya u Conrad Sangma, “Lada ka Narpuh, Lukha wa Sutnga em ki karkhana Coke wa pyrchah aiñ ileh won ha ha Garo Hills ym em nooh u leh kamwa da leh ha East Jaintia?”
Discussion about this post