Hadien wa ka seiñ Khooid Ya Ka Wah Myntdu deilang waka seiñ JSM ini wa dep da yoh ksoh ki ya ki Truck Dumper waka JCB u Friday Hinge uwa man kam u Contractor heipor wa dang kit moo, khloh moo pyrchah aiñ dei synyaaw na ka wah Myntdu iwa da pyntip leh cha ki bor ka aiñ, ynne won ka sngi neiliang u DC ka West Jaiñtia Hills District da khut yachem u kini ki seiñ deilang wa ki chnat sorkar yow yaklam yachem yumut hajrong u yada u pynmiat pynbha yaka wah Myntdu.
Ha ka yachemlang wada pynman ha Conference Room u DC, Jowai da em ka seiñ JSM, JSU, Synjuk Waheh Chnong Ri Jaiñtia, Synjuk Waheh Chnong Jowai, ka Fishing and Environment District Association, ka chnat Forest, chnat District Urban Planner katwa kiwa mihkhmat naka Municipal waka Meghalaya State Pollution Control Board ym em poi ki.
Lyngba i yaklam da chim yaka rai wow wai noh da ka Government Account wa kyrpang neibynta u yada u pynmiat pynbna yaki soodong sookun ka bei rymaw wa em ha West Jaiñtia. Katwa yaka poisa wa yoh na kiwa leh pyrchah aiñ hapoh ka wah Myntdu won u pynlut leh neibynta u pynbha kylla yaka Myntdu hi kamjooh ki rood ki kiar ko.
Ya kani ka Account u tip kam ka West Jaiñtia District Environment & Restoration Fund (Myntdu) wei hapoh kani ka Account ye leh u pdiang ya kiwa kwah u e sñiawbha.
U K.L. Pariat, President ka Khooid Ya Ka Wah Myntdu hawa klam cha kiwa thoh khubor hadien ka yalang, da pyntip u wa u Friday Hinge kam uwa da sñiawthooh yei bakla wa leh u, da su u kamwa T. 5 lak neibynta u pynbha pynmiat yaka wah Myntdu.
Wei lyngba kani ka poisa khana u wa hei tlang daw pynkhooid daw chna chwa yaka Dam ha Moopiah kawa man ka thaw pynlang umdih ka Jowai kawa da pra wei dap khyndaw dap chyiap.
U K.L. Pariat ong u wa wot hadien ka hukum ka NGT leh da yoo chynna wa ki chnat wa toh bynta u kreh leh wym em kreh hok ki yei kaam kamwa hukum ka NGT.
Khut u leh i ya krehlang yong kiwa im ha soodong ka Myntdu kamjooh ki chong wa marjan wow yada neibynta yong i hi i im, katwa ka toh kawa e um, e la’ær.
Hawa e khublei ya u Friday Hinge uwa sñiawthooh yei bakla deiwa e sñiawbha namo ka Donation, kyntu haroh u ya u Ngaitlang Dhar, u Contractor ka Dhar Company wa oo leh toh u e Donation u neibynta u pynmiat pynbna yaka Myntdu, neibhah heipor wa kreh pynheh u ya u sarok nadooh yingkieñ Treiongriang hadooh laad Muphlang da boon ki khyndaw wa pynhaap u cha rood ka wah Myntdu.
Neiliang kiwa yahkhmat ka Synjuk Waheh Chnong Jowai kamjooh yong ka Ri Jaiñtia waka Fishing and Environment District Association wa kynthup ya u Alan Ñiangti, u Army Lipon, u D.H. Pde da kyrchaan lang ki ya ka rai wa chim haka yalang khnang waka Myntdu u im wei khooid ko.
Puræ leh: Chah kem 4 tylli ki Truck waka pooh chiloom wa tih moo tooh na wah Myntdu
Discussion about this post