Ka rynsan e khusnaam yow tipmit yei chet baam chet dih wa i akor saam baam saam dih wa tip kam ka 7th India’s Most Prominent Food & Hospitality Awards-2023, da saam cha palat 40 tylli ki thaw baam wa pynlai da ki bru wa pliah hei chet i tu kam chibynta wow burom ya para wa em ha ki chlem e baam e dih.
Ya kani ka khusnaam da thooh bniah chwa da ka Merit Awards Market Research Pvt Ltd yow chem ya ki thaw baam wa ka-it ki bru ym du yei baam tangwa kamjooh leh wow burom ya kiwa wan baam wan dih wei hadien ini ki bru wa pliah ha ki kaam chet, kaam tu da jied ki ya ki wow yoh ya kani ka khusnaam.
Na ka thaaiñ wa em cha neiñ mihsngi ka ri India, da yoh du ar tylli ki jylla kitæ ka Assam wa Meghalaya kiwa kynthup ya ka Aiti Belti Trattoria na Shillong kawa da yoh yei naam ‘Best Family Restaurant ‘waka Khorikaa Restaurant na Guwahati kawa da yoh yei naam ‘Best Assamese Cuisine Restaurant’ neibynta u snem 2023.
U kongsan ha kani ka sngi toh uwa chet baam wa pawnaam ka ri India, u Sanjeev Kapoor uwa da em ryngkat deilang wa ki kynrem lyndan na ki chlem chna baam chna dih wa bna naam ka ri India.
Ya kini ki khusnaam da jied kyrpang hajrong i pliah u chet u tu, i bang wei chngaaiñ ka baam ka dih, i khooid i suba, wei pnah i khriñ ya ki bru da ka akor burom wa kiwi kiwi de kiwa kyrpang ha ka liang wa yatoh wa i baam i dih.
Kani ka khusnaam toh kawa da saam ha Delhi ha ka 1 tarik uni u bnai wei da lai pdiang da u Balawanpynskhem Suting neibynta ka Aiti Belti Trattoria kawa em ha Khyndailad, Shillong.
Discussion about this post