Ka Behdieñkhlam 2023 ka Seiñ Raij Ialong ha uni u snem da poi ko cha wakut ynne ha Aitnar heiwa da wan sakhi ya ka da u Montri Rangbah ka jylla, u Conrad Sangma kam u kongsan hei emlang u Symbood Montri Rangbah ka jylla, u Sniawbhalang Dhar.
Kiwi kiwa da wan sakhi ya kani ka lehniam kynthup ki ya u MLA ka Jowai, u Wailadmiki Shylla, u MLA ka Umroi, u Damanbait Lamare, ka MLA ka Sutnga Saipung, ka Santa Mary Shylla, ki MDC ka JHADC, u Dolloi ka Elaka Jowai, u Puramon Kynjing, u Dolloi ka Elaka Shangpung u Chanki Langbang wa kiwi kiwi.
Ha kani ka sngi da wanrah hadooh 10 tylli ki rong na ki dong ki kyntoit waphær waphær hapoh ka chnong Ialong wa kamjooh na Wahiajer wa na Nongkyllep kiwa e ya ka Wyrta wow yakhun pyrchah ya i drugs.
Hawa yaklam wa u President ka Seiñ Raij Ialong, u Pyrkhat Shylla da ong u wa kani ka Behdieñkhlam ka Raij Ialong toh kawa da jooh pyndep nadooh ki por warim wei ka lehniam da sdang ko nadooh ka 2 tarik uni u bnai wei da pynkut ya ka ynne ka sngi.
Da ong u wa hapyrdi kini ki sngi da pyndep ya ki sarin niam katkam wa jooh leh ha ka Behdieñkhlam wei da e khublei u leh ya waroh kiwa da wan sakhi ya kani ka lehniam.
Heijooh i por da ong u wa kani ka lehniam toh wow e ngooh e dem ya ki Blai ki Syiem wow beh ya i chitom i saja kamjooh wow kyrkhu kyrdoh ya ki khon ka Raij nadooh kiwa em ha i puræ puthi, i khih i kreh kamjooh leh kiwa im hei rep i riang.
Ynne neiliang ka Raij da e kti ko ya ka dorkhat ha u Conrad Sangma heiyatoh wa i emkaam ka Raij khamtam wa yatoh wa ka Behdieñkhlam nadooh i chna ya ki thaw chongke, ha Aitnar, ki paikhana, ki top um wa kiwi kiwi.
U Conrad hawa e i klam da ong u wa kani man ko ka sien wa nyngkong wow wan sakhi u ya ka Behdieñkhlam ha Ialong kam u Montri Rangbah deiwa e khublei Behdieñkhlam ya waroh.
Da ong u wa ka sorkar u yaleh ko wow yarap wei u kyrchaan ko ya ki lehniam ha ka jylla khamtam ki lehniam tynre.
Chooh chooh da kular u leh wow yarap yeiwa dawa ka Raij ha ka dorkhat wa da e kti ha oo.
Ha kani ka sngi da pynhær leh ya ki diñkum kamwa da jooh leh khlieh-u-snem kamjooh da pyndep ya i Taan Bhang wa i Yaslait.
Discussion about this post