U Lat ka Meghalaya, u Phagu Chauhan ha ka 10 tarik uni u bnai da pynkup burom u ya ki NCC Cadet ka Shillong Group kiwa da mihkhmat ya ka North Eastern Directorate ha ka Republic Day Camp-2023 ha New Delhi.
U Lat hawa e yei klam da yaroh u ya kini ki dkhot ka NCC yei lehbha ki deiwa ong wa i yoh u chimbynta ha ka Republic Day Camp toh iwa hakhlieh dooh i e sikai ya ki NCC Cadet neibhah ha kani ka Camp da e laad ko ya ki Cadet wow pynyoo yei sap i phong yong ki kamjooh ka dustur riti wa mahajon yong ki jylla wa wan ki lyngba kiwa boon ki kaam wa da pynman.
Da ong u leh wa kam ki khynroo ka jylla, ki NCC Cadet toh kiwa man kam kitæ ka juk ‘Amrit Generation’ ka ri kiwa daw pynku ya ka ri cha ki khlieh loom wym jooh poi ha kini ki 25 snem wow wan yow wanrah yaka ‘Viksit’ waka ‘Aatmanirbhar Bharat’, chooh chooh u Lat da ong u wa ki khynroo toh i bor yong ka ri neibhah katni ka pyrthai da kyruiñ khmat ko cha ka India wei kiwa daw yoh myntoi na ini waroh toh ki khynroo.
Ka Republic Day Camp toh kawa pynkut yei pynkhreh wei e sikai ya ki NCC heiwa da em 1800 ngut kiwa da yoh u chimbynta na kylleiñ ka ri. Wei ha uni u snem da em 120 ngut ki Cadet naka NER Directorate kiwa da yoh u chimbynta ha kani ka Camp, heiwa 13 ngut toh kiwa na Shillong Group.
Kiwa da chah jied toh napyrdi ki 1 lak ngut kiwa da chah tyrwa pyrtuid na kylleiñ ki jylla iwa pynyoo yei sap wei man kyrpang kini kiwa chah jied.
Discussion about this post