Ka Sumer Socio Culture Sports & Entertainment Development Society deiwa ya krehlang waka AMS Entrepreneur Multipurpose Cooperative Society Ltd, ynne da sdang ko ya ka lympung yalehbol yong kur kawa da tip kam ka 3rd Sumer League 2023.
Ha kani ka kynti ki kur kiwa da wan wow chimbynta kiwa em hapoh ki ar tylli ki Elaka kitæ ka Elaka Sumer waka Elaka Sutnga, toh ka Salahe Pakem FC Sumer Elaka, ka Paslein Combine FC Sumer Elaka, ka Lamurong FC Sumer Elaka, ka Chyrmang FC Sumer Elaka, ka Dkhar FC Sumer Elaka, ka Dkhar FC Sutnga Elaka, ka Chyrmang FC Sutnga Elaka waka Bamon Suja FC Sutnga Elaka.
Ha ka yalang wai pyrdi ynne, da emlang u Meri Dhar kam u kongsan wa u Shibun Chyrmang kam u symbood kongsan wa ki paralok yong ki heiwa da yoh leh yei klam na u Begin LS Paslein kam u President wa u Amnesty Salahe kam u Secretary kiwa da pynsñiaw yei krehkaam ka Society wa ki thmu yong ki ha ki snem wow wan yow pynman ya ka yalehbol Under-14 yong ki chynrang wa ki kynthai, wei daw pynman biang leh yaka Sumer Got Talent ha ki bnai tlang.
Da yoh leh i klam na u S. Chyrmang, u D. Salahe wa u Meri Dkhar kiwa da kitbok kitrwiang ya ka Society wei da e leh yei sneiñ i kroo ya kiwa yalehke wa chimbynta ha kani ka 3rd Sumer League.
Ha ka yalehke wa sdang ynne, da pynman hapyrdi ka Salahe Pakem FC pyrchah yaka Lamurong FC heiwa ka Salahe da jop ko da 1-0 da ka kool wa thap u Burom Salahe haka minit wa 37.
Ka yalehke mynstep u man ko hapyrdi ka ka Dkhar FC Elaka Sutnga pyrchah yaka ka Dkhar FC Elaka Sumer heipor 12:00 waje pyrdi sngi wei daw pynbood da ka Paslein Combine FC Elaka Sumer pyrchah yaka Chyrmang FC Elaka Sutnga Elaka heipor 2:30 i sngi.
Discussion about this post