U Symbood Montri Rangbah ka jylla, u Sniawbhalang Dhar da pdiang u wa em i slem wow pynkrehkaam ya ka Smart City Road iwa yatoh wa i chna ya ki sarok neibhah wa da emktilang boon ki chnat sorkar.
“Hao hawa yatoh wa ka Smart Road næ i chna ya ki sarok slem i neibhah wa hap ya krehlang wa kiwa boon ki chnat sorkar nadooh ka chnat PHE, ka Health, ka MeECL wa kiwi. Da rap kulmar neibha wa boon ki chnat tangwa ym mut wa i daw toh na ka Smart City. Da sñiawthooh hi neibhah i emyatoh wa kiwi ki chnat lada wow kyrriah ya ki chrot bordiñ, ki sainar wa kiwi toh kiwa emkaam wow yoh bor”, da ong u Sniawbhalang.
Da kam u leh wa ki kreh neibynta ka Smart City da lai ki chakhmat chait chait, deiwa kdaw wa ka yaaw Laitumkhrah toh kawa da jan dep, ka yaaw Polo leh da jan dep wei ha u Wisu (Mar) daw ye u wai noh.
Da khana u wa em kamwa 18 tylli ki kreh yong ka Smart City kiwa dang lai chakhmat kiwa da pynkreh hapoh ka nongbah Shillong hadooh katni wei ka mang poisa da man ko kamwa T. 1000 klur wei i sai poisa man ko mar chiteiñ hapyrdi ka sorkar jylla waka sorkar pyrdi.
Khnang wow pynsmat ya ki kaam ki jaam, u Sniawbhalang uwa man leh kam u Montri ka chnat pynroi sor, da ong u wa daw pynman yei lai pait ya waroh kini ki kreh ki waphær waphær ha Shillong ha kini ki sngi wow wan.
Discussion about this post