Ynne ka sngi, ka seiñ Jaiñtia National Council-Jalaphet Unit hapoh i yahkhmat u President, u Andy Bareh da lai ki wow booddien hajrong i jia wa da jia haka 18 tarik uni u bnai heiwa kawi ka khynnah khian da chah slaitbor ko ha uwi u baar jylla wa tip pyrtuid kam u Sunny Rai.
Hajrong ini, ka seiñ da lai hiar ko cha Khliehriat yow lai booddien yeini deiwa synraan lang waka bei katai ka khynnah yow kylli takit na ki bor yong ka aiñ wei hawa yaklam wa ki pulit ka Women’s Police Khliehriat da pyntip ki hakhmat ka seiñ wa da kem ya utai u bru wa da leh ya ini i kaam wei da pynngat ha ki kyndon aiñ.
Neiliang yong ka seiñ da dap ko dei chrai ya ini wa da leh uni u baar jylla uwa da wan kreh cha kani ka thaaiñ wei neiliang ka seiñ da kyntu joor ko leh ya ki bor yong ka aiñ wow kdoh u khoom yei wan psiah laitlan wei pyrchah ya ka aiñ ki baar jylla iwa da booh hei maa yei lai i wan kiwa chong chnong khamtam ki khynnah kynthai.
Ka seiñ da beiñ joor ko ya kini ki kaam pohjait pohrti kiwa pynthut yei suk i saaiñ wei da dawa leh wow kset waroh chirta ya kam kini ki bru wa sih khnang wa kiwi leh kiwa thmu wow leh ya kam kini ki kaam wa poh leh wow tieñ ki.
Neiliang ka seiñ da ong ko wa daw pynjoor ko yei kynreh ya ki baar jylla kiwa em hapoh ka chnong ka thaw wei wow leh deiwa eh ya ki wei da maham joor leh wa neini chakhmat khamtam ya ki baar jylla yow tip ki wow burom wow em akor khamtam ya ki tre chnong wa ya ki khynnah kynthai.
Discussion about this post