Yoh nyngkong ka Meghalaya ya ka kor ATM wa e da u khoo rachon

Iwa man iwa nyngkong dooh ha waroh kawi ka thaaiñ North East ka ri India, ka chnat Food Civil Supplies & Consumer Affairs deiwa ya krehlang waka United Nations’ World Food Programme (WFP) ha ka 25 tarik uni u bnai da wai paidbah ki ya ka kor wa pna e khoo hi namo ka Automated Grain Dispensing Machine wa da e pyrtuid ‘Annapurti’ ha ka dukan rachon namo ka Fair Price Shop wa em ha R.R. Colony, Rynjah, Shillong.

Deiwa pynemkaam ya kani ka kor, daw pyntikna wa kiwa yoh myntoi daw yow ki yei hok yong ki katkam wa toh u yoh ki wei yow pynmait leh yei rukom saam khoo rachon.

Ha kani ka sngi da emlang leh u Montri kani ka chnat, u Comingone Ymbon, ka Elisabeth Faure kawa man ka Country Director ka United Nations’ World Food Programme deilang wa ki sahep ka chnat.

Neiliang u Comingone da yaroh u ya ka WFP kamjooh ya ka chnat sorkar deiwa khut yei ya krehlang yong waroh yow jop ya waroh iwa eh wa da maad hawa pynpoi ya ki kaam yarap wa da e ka sorkar cha ka imlang sahlang ka jylla. Da ong u wa deiwa pynemkaam ya kam kini ki stat ka juk wa katni wow saam rachon namo ka Public Distribution System (PDS) daw yarap ko leh wow pynman ya ini i kaam iwa khooid.

Related posts

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

Pynkhreh ka BJP Meghalaya ya ka Election 2028 deiwa pynskem ya kiwa kitkaam thymme

June 14, 2025

Kani ka kor ATM wa e da u khoo ye ko wow thaw thij katkam wa toh u yoh u khoo neibynta kitu kiwa yoh myntoi hapoh ka NFSA wei kani ka kor toh kawa ye u thap 200 hadooh 500 Kilo hapoh yong ka wei kawa krehkaam dei bor yong ka hi deiwa pyndait lang waka kor e-POS wei i rukom thaw khoo ko toh iwa tikna 99.99% wei daw pynsmat ko leh yei kaam da 40% neiwa jooh hap yang ki bru.

Kani ka kor najrong wa pyntikna wa waroh yoh ki yei hok yow lait nei dooh nong, ym em leh khlan ko wow baam bordiñ heiwa emkaam ko du 0.6 Watt chi kynta wei ye leh wow pyndait ya ka ha ki Solar Panel wa ki Invertor Battery.

Ha ka 2022 WFP Innovation Awards, ka Annapurti da yoh ko yei tipmit kam kawi na ki 5 tylli ki kor wa dang chna thymme kawa yarap bha ya ki paidbah wei kam ya ka jylla wa khian kam ka Meghalaya da man ko u moomær  wow sahkynmoo wow yahkhmat ya kiwi ki jylla yow pyntikna wa yoh khoo ki bru yow man ki kiwa skem i yoh baam.