Ka Youth Fest yong ka Jowai Diocese Catholic Youth Movement (JDCYM) kawa da pynman ha Holy Cross Umkiang Parish, East Jaiñtia Hills District haka 27 tarik uni u bnai da man ko kawa chitrhem deiwa wan chimbynta ki khon khynroo khyllood naki Parish waphær waphær wa haap hapoh ka Jowai Diocese nadooh ka 26 tarik.
Ka thong yong kani ka Youth Fest toh yow sñiawthooh wei wanrah i yajan haka imlang sahlang, yow em i yakrehlang, yow wanrah i proh wei yaar i chemphang hei im wa samen samen ki khon khynroo khyllood wei iwa kongsan dooh to yow nang pynkhlan chooh chooh i yatoh wa u Blai.
Haka 26 tarik kam ka sngi sdang da em i pynyoo yei sap i phong ha ki rukom waphær waphær wei da em leh i pynsñiawthooh paidbah hajrong i Drugs.
Haka sngi wa bood won ka Sngi U Blai da pynkut yaka Youth Fest da ka Mass Wa Khooid wei mane Sacrament wa da yahkhmat da u Phadar Ebormitre Henry Lamare, katwa yaka lama ka seiñ da pynhiar da uwa e buit ka Jowai Diocese Catholic Youth Movement, u Kmenlang Dhar.
Chwa ini, u Phadar Ebormitre Henry Lamare kam u kongsan yong kani ka sngi da klam kyntu kynpham u yaki khon khynroo khyllood wow booh yei chlur hakhmat, i sarom won chadien neibhah boonsien ki khon khynroo khyllood chlur ki ha kiwi kiwi ki kaam katwa hei kaam yong ki seiñ khynroo won ran dien ki.
Da pynrap haroh u wa i man chlur yarap ko u pynchitrhem yaki kaam nadooh ki Balang chnong, ki Parish wei wot hadooh ka Diocese.
Discussion about this post