Ka yung krehkaam ka District School Education Officer, West Jaiñtia Hills District ynne da pynman ko yei lehkmen ya ka sngi wa kyrpang kiwa sikai namo ka Teachers’ Day ha ka yalang wa da pynman ha District Library Auditorium, Mynthong, Jowai heiwa u Symbood Montri Rangbah, u Sniawbhalang Dhar da wan u kam u kongsan deiwa emlang u MLA ka Jowai, u Wailadmiki Shylla kam u symbood kongsan deilang wa u Deputy Commissioner, u B.S. Sohliya wa u Superintendent of Police ka District, u C. Syrti.
Neiliang u kongsan da yaroh u ya kiwa sikai skur kiwa ym em pyrkhat yei yong idæ wow seiñ dur, pynwan dur ya ki khynnah yow heh u san ki ha waroh ki liang.
Chooh chooh da yaroh u leh yei kreh chitom kiwa sikai wei da pdiang u wa duna i su tulop ya ki tangwa da pteiñ ki wow kreh chitom wow chakri wei wow pynbiang yeiwa emkaam ki khynnah.
Da pynchlur u leh ya ki khynnah wow booh ya ka thong kawa heh wei wow kreh chitom ki.
Da e khublei u leh ya kiwa sikai kiwa yoh ya ka District Award deiwa kyntu ya ki wow pteiñ ki u e yei chakri ya ka imlang sahlang wei da saam u leh ya ki Memento wa ki Certificate cha ki.
Ha uni u snem kiwa yoh ya ka District Award ha ka kyrdan Secondary toh ka Wanhok Lamar, Vice Principal, QC Springside Hr. Sec. School, haka Upper Primary da yoh u Ohiwot Laloo, Assistant Teacher, Government Girls’ Higher Secondary School, Jowai, haka Lower Primary da yoh ka Hilarious Manner, Head Teacher, Umladkhur Government LP School, Khonglah.
Yei naam Best Scout Master da e cha u Jonas K Pala, Tome Memorial Scout Troop/ Sec. School, Mooralong, Jowai katwa yei naam Best Guide Captain da yoh ka Dolly Lamare, Little Angels Guide Company/ Sec. School, Moosalyngkat, Jowai.
Da pynphooh ya kani ka sngi da ki rwai, ki chaad wa kiwi de kiwa da e da ki khynnah skur yow pynoo yei burom wei sñiawgooh ya kiwa sikai ki yei kreh chitom ki.
Discussion about this post