Suba joor ka Liang Pyrchah wa daw pynkylla noh yei pyrtuid ka India cha ka Bharat

Hadien wa pynpoor ki paidbah ha ki Social Media ya i khut sñiawbha neibynta ka ‘G20 Summit Dinner Invitation’ wa da khut da ka President heiwa da thoh yei kyrdan ko kam ka ‘President of Bharat’ heithaw wa jooh thoh ‘President of India’ da mih i suba joor wa da em i thmu ka sorkar pyrdi wow pynkylla pyrtuid noh ka ka ri India cha ka Bharat.

Ini i suba kiwa boon leh toh neidaw wa da khut wow pynman ya ka Special Session ka Parliament heiwa ki phang wow yaklam dang murieh hadooh katni.

Ym du ini, ka Liang Pyrchah ha ka sorkar pyrdi da kdaw ko leh wa ha ka kot lakdop ka sorkar yei lai chimbynta u Prime Minister ka India ha ka 20^th ASEAN-India Summit wa haka 18^th East Asia Summit da thoh wa u Narendra Modi kam u ‘Prime Minister of Bharat’.

Neiliang u Montri ka sorkar pyrdi wa pait ya ka Information & Broadcasting, u Anurag Thakur da ong ko wa ini waroh toh du ka khubor hamsaya wei kitu kiwa pyrchah yei ktien Bharat pynyoo yei rukom pyrkhat ki.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Heiyatoh won wa ka Invitation ka President da ong u wa ka toh ka “Bharat ke Rashtrapati” wei da thoh leh President of Bharat wei ymtoh iwa pher deiwa ong wa oo man u kam u Montri hapoh ka Bharat Sarkar wei man i iwa pynemkaam nadooh nachwa deiwa ong leh wa ha ka G20-2023 daw pynemkaam lang yei pyrtuid Bharat wa India.

Kamtæ da ong u wa kitu kiwa pyrchah pynyoo yei pyrchah ki ha u nood ki ya ka India næ ka Bharat.

Chooh chooh da pynche u deiwa ong ym em pyndam noh yei kyntien India neibhah ha ka G20 dang thoh hi India 2023.

Hawa pait cha kiwa boon wa em ha ka BJP nadooh u Chief Minister ka Assam leh da pynsñiaw u yei sarong deiwa ong, “Ka ri laitlooid Bharat, – sñiawkmen wei sñiawsarong wa ka ri da lai ko chakhmat yow poi cha ka Amrit Kaal”.

Da ong u wa hapoh ka Constitution ka ri leh da thoh India toh ka Bharat iwa man i pyrtuid wa da pynemkaam da ki hajar snem nachwa wei ymtoh i pyrtuid thymme manda ong Bharat.

Kam wow kdaw heini da em wa yaleh PIL ha ka Supreme Court ha u snem 2016 yow dawa pynkylla yei pyrtuid ka India cha Bharat neibynta waroh ki kaam heiwa ka yung bichaar wa ha khliehdooh ka ri da ong ko wa kitu kiwa kwah u pynemkaam yei pyrtuid Bharat næ India ye ki wow leh katwa sñiaw kwah ki.

Ha ka Article 1(1) ka Constitution ka ri da thoh. “India, that is Bharat, shall be a Union of States.”