Paan pynche ka JAC yei kyrriah biang ya ka yung krehkaam ka Wapung C&RD Block cha Khliehriat

Ka Joint Action Committee Wapung C&RD Block, kawa kynthup ya ka Dorbar Chnong Wapungskur waka Dorbar Chnong Wapungshnong da pynsñiaw ki yei sñiaw lyngngoh wei heijooh i por leh dawa ki yei pynche na ka sorkar hajrong i rah syndet biang ka sorkar ya ka yung krehkaam wa chipor yong ka Wapung C&RD Block na Wapungskur cha Khliehriat khlem da tip yei daw wei khlem da kynjoh ktien chwa cha ka JAC Wapung C&RD Block, cha ka Dorbar Chnong Wapungskur wa ya ka Dorbar Chnong Wapungshnong kiwa da ya embynta nadooh wa sdang hadooh wa da wanrah ya katai ka Wapung C&Block na Khliehriat cha ki thaaiñ Wapung.

Kamtam i pynbait wa kat wym pu dep u chna ya ka yung krehkaam wa pura yong ka Wapung C&RD Block ha i thaw wa da e sñiawbha da ka chnong Wapungskur waka chnong Wapungshnong cha ka sorkar jylla neibynta u booh wei chna ya katai ka Wapung C&RD Block Office, da booh ka sorkar ya ka yung krehkaam wa chipor yong katai ka Block ha kawi ka yung wa em ha ka chnong Wapungskur ha u Wisu (Mar) yong u snem 2022. Wei nadooh itai i por hadooh ka 7 tarik yong uni u bnai, katai ka yung krehkaam wa chipor da e ko yei chakri ya ki paidbah na katai ka yung.

Tangwa syndet syndet ha ka 8 tarik yong uni u bnai, da chem wa ya katai ka yung krehkaam wa chipor yong ka Wapung C&RD Block da rah biang ya ka cha Khliehriat khlem tip hajrong iyi i yurim wa rah biang ya ka kamni.

Ha katai hi ka sngi wa rah ya ki tiar ki tar yong katai ka yung krehkaam, kiwa yakhmat yong ka JAC Wapung C&RD Block da pyrchang ki wow thooh yei daw wa kyrriah ya katai ka yung krehkaam cha Khliehriat hadien du chisnem chiteiñ donhi wa da em ko ha ka chnong Wapungskur heiwa da pyrchang u Phone ya u Block Develop Officer yong katai ka Block, tangwa ym bien u jubab Phone, weiwa da pyrchang leh u kylli deiwa phah da ka Message lyngba ka WhatsApp heiwa yeini leh ym em bien u jubab.

Related posts

Kyntu ki seiñ ki jaitbru ri-loom ka Manipur wow dam u chibynta ha ka Election District Council

November 13, 2024

Ym yoh Ticket u Baitlang na ka VPP wow yakhun MDC na Jowai South, paan u yei kyrchaan kam u kyrtong samen

November 12, 2024

Ini i leh yong ka sorkar kamni man ko kayi kayi kawa pynlyngngoh wei pynchrai ya waroh wa kammon ya ka Wapung C&RD Block Office kawa ki ar dorbar chnong da em ki ya ka bynta kawa khroo bha heiwa u wanrah ya ka cha ka thaaiñ Wapung deiwa e mynkna yei thaw chnong iwa heh bha neibynta wow chna ya ka yung krehkaam wa pura deilang wa i thaw sah ki wakreh, tangwa manda rah won ya ka na ka thaiñ Wapung cha Khliehriat, ki ar dorbar chnong deilang waka JAC Wapung C&RD Block ym tip de ki iyi iyi leh. Katwa kamtæ da suba joor wa ye u em iyi re iyi cha kylla yong ini.

Katwa kamtæ, khnang wa ka ka JAC Wapung C&RD Block, ka Dorbar Chnong Wapungskur, Dorbar Chnong Wapungshnong wa ki paidbah yong ka thaaiñ Wapung yow che ki kdar heiyatoh wa ini i rah biang ya katai ka yung krehkaam cha Khliehriat, da dawa na ka sorkar næ kiwon kiwon ki bor wa toh sap u pait yeini wow hap ki u e yei pynche yow che lang waroh.

Ka JAC Wapung C&RD Block da ong ko wym chong kyllaiñ kti ko heiyatoh wa kani ka kaam, tangwa u booddien ko ya kani hadooh wa che kdar wei hadooh wa hap biang ki bor wa tohsap u pait yeini wow wanrah biang ya katai ka yung krehkaam wa chipor ha Wapungskur hi.

Ka kyrwoh wa da phah da u Secretary ka JAC Wapung C&RD Block, u Hercules Mutyen, u Waheh Chnong ka Wapungskur, u Deolangki Dkhar wa u Waheh Chnong ka Wapungshnong, u Kduplang Ryngkhlem.