Ka Khasi Students’ Union- Laban Circle da phah ko ya ka Wyrta wa che cha ki jaitbru Karbi wei kamjooh leh ya ka Karbi Anglong Autonomous Council (KAAC) waka sorkar Assam wow sangeh noh chisiendon yei leh embor yong ki ya ki paradoh parasnaam kiwa em ha khappood deiwa pyndik neipor chei por deiwa toor pood cha ka jylla Meghalaya, i khrong dan pyrchah aiñ ya ki kari mar rep yong kiwa chong chnong yong ka jylla, i maham pyntieñ da ki seiñ kieñ suloi ki Karbi wa i leh embor ki pulit Assam.
Yeini ka seiñ da ong ko hadien wa ynne u Montri Rangbah ka Assam, u Himanta Biswa Sarma da wan wai u ya ka Karbi Hemtum namo ka Karbi Guest House kawa em ha Laban wei wow booh ya u mooyurim neibynta ka 100-Bedded Students’ Hostel neibynta kiwa lai puræ ka Karbi Anglong.
Ka seiñ da ong ko wym em pynthut ko yei chna ya kani ka Karbi Guest House ha Laban neidaw wym man ki kam ki jaitbru wa bichni wei wow pyndik yei emkaam yong kiwi won ki jaitbru ri-loom neibhah i toh ki jaitbru wa Tip Bru Tip Blai tangwa heijooh i por ym ye wow suki hi-eh lada ki paradoh parasnaam ki yong i won chah pyndik ki ha ki Karbi.
Kamtæ ka seiñ da maham joor ko ya ki paaid Karbi waka sorkar Assam wym toh u toor pood de cha ka jylla Meghalaya wei wym toh u pyndik ya kiwa sah ha West Jaiñtia Hills District, lym kamtæ ka seiñ daw chim ko da ka luti wow khang khyrdep ya ka Karbi Guset House ha Laban wei wow pyndik kamjooh ya ki jaitbru Karbi kamwa pyndik ya ka jaitbru yong i.
Puræ leh: Da wai ya ka Guest House ki Karbi ha Shillong
Discussion about this post