Iwi i Video wa da yoh riñdur lyngba ka CCTV yong ka State Bank of India (SBI) Ranikor Branch, da yoo yei yaknieh psiah ki paidbah iwa da yoo chyrkhei u pait heiwa ka rukom chah ban ka Gate wei yaknieh man ko thij kam kiwa lait na phylloh wei wot wa u bru wa yang ya katai ka thaw da jan chah yooh u ha ki paidbah.
I daw yong i lai toor yong ki paidbah ha katai ka chnat SBI toh neidaw wa kani ka Bank em ko du 6 ngut kiwa kreh wei hap ki wow chakri won ya ki paidbah yong 150 tylli ki chnong, najrong i wym biang kiwi de ki kor krehkaam nadooh ka Internet wa i bordiñ kiwa emkaaam yow ye u pynlai yei kaam man-ka-sngi ha katai ka Bank.
Ya ini i duna da da chem hadien wa ki dkhot ka KSU Ranikor Circle hapoh i yahkhmat u Siril Langte wa u Orisstar Langte da lai yachem ki wa u Branch Manager yong katai ka Bank.
Ha ini i lai yachem ki dkhot ka KSU da chem leh wa u Branch Manager yong katai ka Bank da hap u wow krehkaam lang wa kiwi yong oo wei ym jooh chong u hapoh ka kamra krehkaam yong oo hi.
Neiliang kiwa yahkhmat ka KSU da pynsñiaw ki yei emkaam chooh chooh wow em sa kiwi ki Bank ha kani ka thaaiñ neibhah kamwa man katni da khia palat ya kani ka Bank kawa em.
Ha iwi won i liang, ka seiñ da kyntu ko ya u MLA ka thaaiñ u Pius Marwein wow kyruiñ cha ki paidbah kiwa da maad yei eh hawa yatoh wa ka Bank.
Discussion about this post