U Montri Rangbah warim ka Meghalaya, u Dr. Mukul Sangma uwa man leh u heh ka AITC da ngat u da ka Legal Notice kawa Rs. 20 klur ha u Henry Lalremsanga uwa man leh kam u Chairman ka 2B’s Group of Companies hadien wa khut u Dr. Mukul ya u Henry kam u “Drug Kingpin” hapoh ka yung dorbar chna aiñ ka jylla ha kini ki sngi wa dep.
Kani ka Legal Notice da ong ko wa ini i pynbaad u Dr. Mukul toh iwa khlem yurim wei da pteiñ u leh wow pynbaad cha lait ka yung dorbar manda yaklam u wa kiwa thoh khubor iwa da ktah yei pyrtuid wei burom u Henry.
Hapoh ka Notice wa da phah cha u Dr. Mukul da ong wa u Henry Lalremsanga ha u snem 2013 da chah kem u deiwa chah pynbaad bakla u hadien wa yoh u kem yei dawai hanla oo em u ya ka License wa biang yow pynlai yaaw ya kini ki dawai wei ka yung bichaar leh ym em chem ko yeiwa bakla u heiwa da pynlait ya oo na kiwon kiwon ki kyndon aiñ da ka Special Court, ND&PS Act, Patiala House Court, New Delhi ha u snem 2018 neidaw wym biang ki sabut wow pynyoo wa tyngkheiñ aiñ u.
Chooh chooh da ong wa ini i pynbaad u Dr. Mukul da ktah ko ya u Henry hei khih i khan wa boon wa pait wa pynlai u kamjooh da ktah i leh yei pyrtuid yong waroh ki Mizo.
U muktiar u Henry, u K. Kharmawphlang da ong u wa ini i chah pynaad u Henry toh iwa leh chynnam yow yoh myntoi samen u Dr. Mukul ha ki kaam Politics khlem da pyrkhat kammon ktah ko ya kiwi wei ini i pynbaad da ktah i hadooh wym ye de u pynbait khamtam yei kamai kajiah wa i yatoh wa kiwi ki bru kamjooh i suk i saaiñ ha ka yung ka sem u Henry.
Hapoh ka Legal Notice da dawa na u Dr. Mukul Sangma wow paan map u wei wow chim biang ya waroh iwa da klam u hapoh 7 sngi wei wow su u Rs. 20 klur kam ka bai pynbood naam yei pyrtuid u Henry lym kamtæ daw lai chakhmat da ka mukotduma (Criminal & Civil Suit).
Discussion about this post