Hadien wa da boon ki dorkhat, ki chithi wa da phah cha ki bor District, bor sorkar kamjooh cha ka NHAI da ki seiñbhalang, ki Synjuk Waheh Chnong, ki seiñ kiwa kamai kari wa kiwi de yow pynchna noh ya u sarok NH-6 kiwa da kut hei yoh jubab kular donhi wei i kular wa khaddooh toh iwa da e ha u Naisaphra uni u snem da ka NHAI yow pynchna ya uni u sarok hapoh 6 tayaaw tangwa ym em kiwon kiwon ki dak ki chin wa da leh yeini.
Kamtæ ynne ka KSU-East Jaiñtia Hills District Unit da pynman ko yei yakhih deiwa yoh yei kyrchaan na kiwa boon ki seiñbhalang, ki seiñ wa kamai kari wa ki paidbah heiwa da pynman leh yei thung kba ha ki bynta wa dap um, dap thlu deiwa wan pynhaap lang wa i khyndaw da kiwa yakhih yow chimbynta ha ini i thung kba.
Da em leh kiwa da khwe dakha ha kini ki nan kani ka sarok wei kiwa boon ki dukan ha Khliehriat toh kiwa khang.
Ka thong wa hapyrdi kani ka yakhih toh yow ya thiah ya chong hapyrdi sarok iwa da leh ynne ha ki bynta ka khliehriat.
Neiliang u KS Suchiang uwa man kam u President ka KSU Narpuh Circle da ong u wa ynne da man ko iwa da kut i e por ya ka NHAI kawa da kular wow pynchna ya u sarok hapoh 6 tayaaw kamtæ ym ye de wow chah yeini i thok chukor khamtam ya ki paidbah kiwa maad yei chitom neini i leh ka NHAI.
Kiwa kamai kari kiwa da wan wow pynyoo yei kyrchaan da ong ki wa i sih sarok da ktah bha ko ya ki kam kiwa kamai wei kamjooh leh ki paidbah heiwa heithaw u chimpor du kattu katni da hap lai da ki kynta wei em i por waroh chi sngi neidaw wa joor sih u sarok wei sahkut kari.
Kam wow pynkynmoo wa hadien kani ka yakhih myntu, hei miet nadooh 7:00 waje hadooh 5:00 waje i step won daw khut ya ki paidbah wym toh u mih ki cha lait deiwa sai da ki kari wei da kyrpaad leh ya ki paidbah wow ya ksoh kti lang ki.
Ka seiñ da ong ko wa kani ka yakhih toh deiwa jai-jai wei ym em kwah ko wow mih iwon iwon i pynkulmar.
Discussion about this post