Kam chibynta i lehwarom ya ka sngi yong i thoh i puræ puthi wei wow kyrsu kyntu ya ki paidbah wa chong chnong hajrong i kordor yong i stat i tip ha kani ka juk wa katni ha ka mat kyrpang wa ong “Promoting Literacy for a world in transition: Building the foundation for sustainable and peaceful societies.”
Ha ka 28 tarik uni u bnai ha chnong Pdengshakap, ka yung krehkam u Block Mission Coordinator, SSA Amalarem da pynman ko ya ka Enrolment Drive Rally hei chimbynta ki khynnah skur wow e wyrta chula chaphang i emkaam wow man kiwa tip u thoh u purae ha kani ka juk wa che wa stat katni.
Ha ka yalang wa pynlai da u H.C. Lamin, BMC, SSA Amlarem da yoh i klam pdiang burom na u A. Kassar, Head Teacher Pdengshakap Govt. LPS katwa ya ki kyntien kyrpang ha ka yurim yong ka World Literacy Day 2023 da klam da u S.D. Laloo, DCCM, SSA wei hawa kut ka yalang won ka P. Suting, CRP Pdengshakap Cluster da e ko ki kyntien khublei.
U W. Chyrmang wa man kam u kongsan yong kani ka sngi hei e kyntien da pachat u chiboon ki kyntien sneiñ kyntien kroo wei e mynsien leh ya ki khynnah wow man kiwa kreh dohyap hei puræ puthi yong ki neibhah i stat i tip toh u chabi heiwa man da em yei stat ha kti, i manbru longbru leh lait i nei chah pynbiej wei chah phon chah chakæ.
Neiliang u BMC, SSA Amlarem deilang ka DMC-SSA SEMAM, West Jaiñtia Hills ha ka yurim ki kaam wa bha yong ki Volunteer haman ki Special Training Centre, da chim ki wow pynkyrpang ya kani ka sngi lehburom yei thoh i puræ deiwa pynkupburom ya ki 11 ngut ki Volunteer kiwa da e i chakri wa miat wa bha hei wow saiñdur saindar ya kitu ki khynnah wa em hapyrdi i dooh kyrmen hei wow man kiwa tip u thoh u puræ.
Chooh chooh ha kani ka sngi da saam leh ya ki Trophy cha ki khynnah wa jop ha ka Drawing-Painting Competition hajrong ka phang wa yatoh wei puræ puthi neitæ da saam leh ya ki tair sah kynmoo cha ka Pdengkseh Govt. LPS, ka Pamtbuh Govt. LPS waka Pdengshakap Govt. LPS wa man kam kiwa jop yong ka Slogan Competition.
Discussion about this post