Uwon uwon u sarok ym toh u e laad u sih u kam u NH-6: High Court

Ka mukotduma PIL wa da yaleh heiyatoh wa u sarok National Highway-6 da chong bichaar biang ya ka ynne ka sngi da ka Meghalaya High Court heiwa ka National Highways Authority of India (NHAI) da phah ko yei jubab deiwa khana wa da thung da u Contractor wa thymme nadooh ka 29-09-23 yow pynchna ya u sarok na Sonapur cha Ratacherra.

Ka NHAI da khana ko wa da pyndap ya ki thlu, da pynkhooid ya ki dooid wei da pynchna leh ya kiwi kiwa sih wei da pait bniah leh ya ki bynta wa em ka Sonapur Tunnel. Ka yung bichaar da ong ko wa da yooluti wa i kreh da man sakhiat i kamwa da pyntip yow lait ki paidbah nei chitom wa pynemkaam ya uni u sarokbah.

Neiliang won uwa yaleh mukotduma, u Kynjaimon Amse da wanrah u yei dur wa pynyoo wa i bynta ka chong Mynkre, Tongseng, Sonapyrdi wa ha Lumshnong kiwa da chondur ha ka 4 tarik uni u bnai toh kiwa da sih hadooh kattæ kattæ wa da em sa du ki thlu wa heh wei ym em ki dak wa da kreh yow siang psiang deiwi.

Hadien wa yoo ya kini ki dur, ka yung bichaar da ong ko wa ym ye u pdiang wa sih hadooh kat deini deiwa ong ya ka NHAI wa kam ka chnat ka sorkar pyrdi toh i kaamram yong ki wow leh yeiwa da pynkit ha ki neibhah i rukom man ka jylla toh iwa da eh chwa wow poi luti cha waroh ki chong yow pynpoi ya ki mar wa emkaam.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kamtæ da yooluti wa i kreh ya waroh uwi uni u sarok nadooh na Jowai cha Ratacherra toh u pyndep noh ha kini ki bnai wow wan wei i kreh wa pura toh u pyndep hadien neibhah ym hoi u em uwon uwon u sarok kamjooh u Highway hapoh ka ri wow man u kamwa man u NH-6 katni.

Ka yung bichaar da ong ko leh wa ki bor District wa ki chnat sorkar da toh u lai pyntip ki cha ki heh ka NHAI wa em ha Shillong yow pyntikna wa uni u sarok u man u uwa miat ymtoh wow yang hadooh wa da sih u kamni katkam wa da sakhi na ki dur.

Da phah leh ya u DC ka East Jaiñtia Hills wow phah ya ka Report yong oo hi kawa laitlooid deiwa khana hok kammon lai i kreh yow pynchna ya uni u sarok.

Ya ka sorkar jylla da phah wow pyntikna wa pyndep u pynchna ya u Jowai Bypass ha ki soo tayaaw wow wan khamtam ha kini ki por wa da kut i por slap.