Sdang ka NEIGRIHMS ya ka 4D-Radiation Therapy ya kiwa yoh Cancer kawa nyngkong dooh ha ka thaaiñ

Ka NEIGRIHMS sa chisien dapoi ko sa cha uwi u moomær deiwa sdang ya ka 4D-Radiation Therapy neibynta wow sumaar ya kitu kiwa yoh Cancer wei kani da man ko ka sien wa nyngkong hapoh ka thaaiñ North East.

Kani man ko ka rukom sumaar Radiotherapy kawa dang thymme bha kawa em du ha ki kattu katni donhi ki thaw ha waroh kawi ka ri India kawa daw yarap bha yow sumaar khamtam kitu kiwa em Tumour wa khih heipor wa riñ mynsien, da ini i rukom sumaar daw leh kyrpang ya kitu kiwa em Tumour ha ki snier, u dohnood wa u Pancreas heiwa ka Radiation daw ye ko u tynyap ya kini ki jait Cancer khlem da ktah ya kiwi ki bynta i doh wa em hajan i thaw wa chah ktah.

Neiliang u Prof. (Dr.) Nalin Mehta, Director ka NEIGRIHMS de e u yei yaroh ya ki Doctor kam u Sumit Kumar, u Deiwakor Chyrmang, u Radiation Safety Officer, ki Medical Physicist wa ya ki Radiotherapy Technologist kiwa da kreh chitom, deiwa ong wa dap dei sñiawsarong wa ka NEIGRIHMS Radiotherapy Department da ye kow wow pynkrehkaam ya kani ka 4D-RT, kawa tip leh kam ka Respiratory Gating, kawa pait ya ki jait Cancer kiwa khih manda riñ mynsien kiwa chitom.

Da ong u wa deiwa em leh ya ka High Energy Linear Accelerator, ka 4D-CT Simulator waka Brachytherapy, kattu i sumaar Cancer toh iwa yahaap kyrdan waka pyrthai waroh kawi iwa da leh kattu hapoh ka Regional Cancer Centre, NEIGRIHMS ym du neibynta kiwa chong chnong ka Meghalaya, tangwa ya kiwa chong chnong ka North East wa ki ri wa em chajan kiwa hap wow lai cha jngai nachwa.

Related posts

Sdang ka Woodland WK Hospital yei pynkha khon wa khlem kjut iwa nyngkong dooh hapoh ka West Jaiñtia Hills

March 22, 2025

Pynman ka Jowai City YMCA ya ka Health Camp neibynbta kiwa da heh rta

March 21, 2025

U Dr. Vikas Jagtap, Additional Professor & Head, Department of Radiotherapy, da khana u wa kani ka jait sumaar toh kawa chimpor yow ye u leh wei da emkaam leh ki kor kiwa thymme bha kiwa ye u leh yeini. Ya kiwa wan chah sumaar daw hap sikai ya ki kattu sngi chwa wow sumaar kammon wow riñ mynsien yow ye u man i sumaar iwa thij du ya i bynta wa chah ktah donhi hawa leh ya ka Radiation.

Da khana u wa nachwa da em 250 ngut kiwa kjut wa da sumaar da ka Radiation wa tip kam ka 3D-CRT, VMAT (Volumetric Modulated Arc Therapy) waka ARC Therapy kawa da yarap yow lait nei chah ktah hei Radiation.

I bai chah sumaar Radiotherapy wa Chemotherapy ha NEIGRIHMS toh iwa da pynduna dor ya kiwa yoh Cancer. Ya kitu kiwa em ya ka MHIS wa kiwa yoh myntoi na ka PM-JAY, ye ki wow yoh myntoi du deiwa pynyoo ya ka Registration Card.

Puræ leh: Da wai ya ka Regional Cancer Centre ha NEIGRIHMS wa kiwi ki tiar sumaar wym pu em wa yoh hapoh ka ri