Kam chibynta wow bood yeiwa phah ka sorkar pyrdi, ka sorkar Meghalaya ynne da mynjur ko ya ka Draft yong ka Meghalaya Street Vendors (Protection of Livelihood and Regulation of Street Vending) Scheme 2023.
Lyngba kani, ka sorkar da thmu ko wow pynbiang yeiwa emkaam wei wow e laad wow kamai ja-kpoh ya kiwa chongdai madan wei kamjooh leh i emkaam yow pyntikna yei chongsuk chongsaaiñ, u pynlait nei khynnia wei wow em i chngaaiñ wa kiwi kiwi de.
Ini i rai yong ka sorkar jylla toh kawa lai katkam ka ka Street Vendors (Protection of Livelihood and Regulation of Street Vending) Act, 2014 wa da mynjur da ka sorkar India ha u snem 2014, kawa da phah ya waroh ki jylla ka ri wow chna ki da ki kyndon (Rules) khnang wow booh kyndon yei rukom chong dukan madan wei wow e yada yei hok yong kiwa chongdai madan.
U Paul Lyngdoh uwa man kam uwa e ktien ka sorkar MDA-II da ong u wa ka yalang yong ki Montri ynne ka sngi da rai wow tipmit ya kiwa chongdai madan deiwa hap ki wow pyndep ya ki kyndon, kiwa hap ki wow em ya ka EPIC thap Vote na kani ka jylla, hap ki wow man kam kiwa chong chnong ka Meghalaya ym duna ya ka le snem wei toh u man kam kiwa chongdai hei jooh i thaw la ynru bnai.
Najrong kini, toh u yoh License khayi na ka Municipal næ na ka District Council ha ki thaw kiwa haap katkam wa toh u pait da kini.
U Paul da khana u wa kini ki kyndon da mynjur hadien wa da yoh yei e yumut na ki seiñbhalang, ki dorbar chnong, ka KHADC, kamjooh na ka seiñ kiwa chongdai madan.
Da ong u leh wa ka sorkar daw pynman ko yei thooh wei pynlang bniah ya kiwa chongdai madan wei daw hap ki wow pyndap ya ka Form yow Register kamwa da pynkhreh ka sorkar yow tipmit kam kiwa dai madan.
Ka sorkar da pynkhreh ko leh wow booh yei thaw neibynta kiwa chongdai madan wei wow pynbna leh ya ki thaw wym hoi u chongdai madan, khnang yow wanrah yei khooid yow lait nei khynnia.
Puræ leh: Du kiwa em ya ka CoV wow ye u chongdai madan manda krehkaam ka aiñ thymme
Discussion about this post