Ynne i janmiet da pynlait paidbah ya i sur yong ka phlim Pnar wa tip kam ka Yndæ ya kawa daw wai paidbah ha ki bnai wow wan yong uni u snem da ka Yaman Creation, wei ya ka yalang da pynman ha Yungwalieh ka Panaliar, Jowai.
Ka Yaman Creation toh kawa da sdang nadooh u 2004 kawa em ka thong wow pynmih ya ki phlim Pnar heiwa nyngkong dooh ka phlim wa pynmih ko toh ka Man I Sa neitæ ka Chakæ, Wymhasa waka Du Chi Læm kawa da pynmih ha u 2011.
Ya ka yalang da pynlai da u Arwotki Sumer uwa da ong wa ynne da pynlait ya ar tylli ki sur wei kiwi ki ar tylli ki sur won daw pynlait ha ka phlim.
U B. Lonely Phira da man u kam u kongsan wei da e khublei u ya waroh kiwa da wan cha kani ka yalang wa tbian.
Da khana parom u kajiak heiyatoh wa i pynmih sur nadooh i leh Drama iwa da sdang na ki Tyngkong ki Yungwalieh wow pynyoo ya ki sap wa em ki wei kat dang yah i por dang mih chooh chooh ki.
U Lonely da pynkynmoo u ya i por wow dai ya ki Cassette heiwa da ong u wa ki sur wa da mih heitu i por waroh ka Ri-loom Jaiñtia kyruiñ ki cha Jowai wow yoh ki wow pynemkaam.
Da pynsñiaw u yei wit heiwa em ki lok wa chna phlim wa pynmih ki ya i kyntien i wym sñiawsuk iwa pyntakha ya kiwa pait.
Heijooh i por da ong u wa kiwa em ya i sap kam hei rwai wow man kiwa syndong, khamtam kiwa rwai wow yait ki na i baam kwai.
Ya ki kyntien khublei da yoh na u E. Manbha Kynjing wei ya kini ki Video da pynmih ha ka YouTube Channel ka Yaman Creation.
Discussion about this post