Hadien wa booddien ka seiñ Jaiñtia National Council (JNC) yei long i man ka Residential School kawa em ha Byndihati-Umtyra, East Jaiñtia Hills kawa da ieh khlem pynemkaam, neiliang ka sorkar da chimkhia ko hajrong ini wei da phah leh yaka Estimate Committee yong ka sorkar jylla wow lai pait dei khmat ha kini ki sngi wa da dep khnang yow ye u leh ya iwa emkaam.
Ka seiñ ha u Naikhynde uni u snem da dep ko wow lai yachem wa u Symbood Montri Rangbah, u Sniawbhalang Dhar yow lai e dorkhat neibynta kani ka thaw puræ kawa da ieh da boon snem khlem da pynemkaam heiwa u Sniawbhalang da kular u wow chimkhia hajrong ini wow phah leh ya kiwa toh u pait ya ini i kaam.
Hadien ini ka seiñ da yoh ko leh wow yachem wa kawi na ki dkhot ka Estimate Committee kawa da wan wow yoo wow sakhi ya kani ka thaw puræ, ka Santa Mary Shylla, MLA kawa da khana wa i daw bah wa slem i pynemkaam toh neidaw wa dang duna iwa emkaam heiyatoh waka thaw wei ya ka yung leh emkaam wow chna khnang wow yahaap katkam i emkaam wa i dawa yong ka Residential School, wei da kyrpaad leh ya kiwa yahkhmat ka seiñ wow man kiwa yaichah sa kattu katni por wei wow e laad ya ka sorkar yow thooh ya ki laad ki luti khnang wa kani ka thaw puræ ym man ko kawa sepai.
Neiliang ka seiñ da dap ko dei sñiawngooh wa khroo ya ka sorkar wa da smat ko wow chimkhia hajrong ini i bynta wei da yooluti wa ki chnat krehkaam ka sorkar u leh ki yeiwa emkaam neibynta i bha i miat ki paidbah yow yoh yei myntoi.
Discussion about this post