I pynkhreh ya ka Election MP cha Lok Sabha ka wow man ha u snem wow wan da sdang lai i chaaid chaaid, wei kiwa boon ki seiñ da sdang thooh ki ya ki kyrtong wow poi cha ka thong. Kawi na ki seiñ ri-loom wa heh, ka United Democratic Party (UDP) leh da pynkhreh ko neibynta ini wow sai ya u kyrtong na Shillong Parliamentary Seat.
Katkam ka khubor wa da yoh da em le ngut ki kyrtong kiwa da paan Ticket na ka UDP, kitæ u MLA warim ka Mawlai, u Process T. Sawkmie, u President ka Khasi Authors’ Society (KAS), u Dr. DRL Nonglait wa uwi u heh seiñbhalang uwa man u President warim ka Hynniewtrep Youth Council (HYC), u Robertjune Kharjahrin.
Hawa pyrchang yaklam wa u heh wa hakhmat ka Party, da ong u wa ha i yaklam chawah chaneiñ da mih chiboon ki pyrtuid wei kini ki le ngut toh kiwa da rap mih hakhmat wa kwah ki u yakhun ya ka Election MP na ka UDP, tangwa da ong u wa hadooh katni ka Party ympu yaklam ko hajrong ini.
Katkam ka khubor da ong wa ka UDP hadooh katni ympu pyrkhat ko wow tyrwa Ticket yeiyi yeiyi, tangwa kini ki le ngut kiwa da paaw bha da lai pynsñiaw ki da idæ wow man kam ki kyrtong ka seiñ ha ki kattu katni ki heh ka UDP.
Kam wow pynkynmoo wa ha ka Election MP 2019, ka UDP da yoh ko i kyrchaan na ka kynhun synrop Meghalaya Democratic Alliance (MDA), wow sai ya u Dr. Jemino Mawthoh kam u kyrtong wa da monlang (Common Candidate), tangwa ym ye u poi cha ka thong wei da chah pynrem noh u ha u kyrtong ka Congress da kamwa 1,52,433 Vote.
Ka khubor da ong ko wa neiliang ka UDP ym tyrwa de ko ya u kyrtong monlang ha kani ka Election, wei da ong leh wa u Dr. Jemino Mawthoh uwa man u General Secretary ka UDP da randien u wow yakhun Election MP. Hanla hadooh katni ym pu che yei yi ka UDP u sai ko kam u kyrtong cha Lok Sabha napyrdi kini ki le ngut kiwa da tyrwa cha ka Party, tangwa katkam ka khubor wa da yoh da ong wa ki heh wa hakhmat ka Party da noh ki cha u Dr. DRL Nonglait wow man kam u kyrtong MP.
Discussion about this post