Ka 5th Evening Super-4 Football Tournament 2023 wa pynman da ka Sports & Youth Affairs Committee ka Chutwakhu Social Welfare Durbar, Jowai da sdang ya ka ynne i miet ha madan Basketball wa em ha madan Jrisaleiñ.
Ya kani ka lympung yalehbol da wan wow wai da u E. Pohshna, Asst. Executive Engineer MeECL kam u kongsan deiwa emlang u K. Syrti, Asst. Executive Engineer ka MeECL kam u symbood kongsan.
Neiliang u kongsan da yaroh u ya ka seiñ khynroo ka chnong kawa da ye wow pynman ya kani la san snem kattu wei da pynchlur u leh wow chimbynta ha ki kaam yalehke yow yoh yei chait i khiah wei da pyn-eh-daw u ya waroh kiwa da wan wow chimbynta.
Ha uni u snem da em 32 tylli ki Team kiwa da wan chimbynta wei da sdang da ka yalehke hapyrdi ka Chicago SC waka Niam Rong FC wa da jop da ka Chicago da 4-3.
Ya ka Chicago da thap kool da u Wamesanlangki Mynsong haka minit wa 17 wa 33 wa u Jonathan Biam haka minit wa 19 wa 20. Ya ka Niam Rong won da thap da u Roplin Ramut haka minit wa 5, u Ohiwatip Pohplet haka minit wa 16 wa u Badskhem Dkhar haka minit wa 25.
Mynstep daw pynman ar tylli ki yalehke kawa daw sdang da ka East Block FC waka Young Brothers DC heipor 6:00 waje i miet wei daw pynbood da ka Nangsan Saphi FC waka Spartan FC heipor 7:00 waje.
Ka yalehke man ko da ka Knockout wei kiwa jop Final daw yoh ki ya ka song poisa kawa Rs. 30,000 katwa kawa rem won daw yoh ki Rs. 15,000.
Discussion about this post