Ka NCC Directorate yong ka thaaiñ North East hapoh i yahkhmat u Maj. Gen. Gagan Deep, Additional Director General (ADG) NCC, Northeast Region da lehkmen ko yei dap 75 snem i lai luti ka NCC deiwa pynman yaka North Eastern Region Car Rally kawa da sdang ha ka 6 tarik na Shillong wei i thmu u lai lyngba waroh ki jylla ka thaaiñ North East hapoh 21 sngi wei u lai luti leh yei jngai kamwa 3500 Km iwa daw pynkut won haka 26 tarik uni u bnai ha Guwahati kam chibynta ka NCC Day.
I thong yong kani ka Car Rally toh yow lai yooh kjat ha man ki jylla ka thaaiñ North East lait noh ka jylla Manipur wei man ko leh chibynta u saam kylliang wei u nang ku i tip i chemphang la heiyatoh ka distur riti ki jaitbru waphær waphær, ki yurim ka NCC wa kiwi kiwi.
Kamwa ha kani ka sngi toh i sdang yei lehkmen, neiliang ki heh NCC ka thaaiñ North East kiwa da lai Rally da ki kari da wan hiar yooh kjat nyngkong dooh ki ha Jowai ha Kiang Nangbah Govt. College wei heini da yachem yaki khynroo khyllood wa chah sikai NCC yong ki skur ki College waphær waphær kiwa da pdiang sñiawbha leh ya ki chirup i emlang kiwa sikai.
U Maj. Gen. Gagan Deep hawa klam ong u toh u sñiawthooh wa i ku ka ri u man ko la toh kiwa chong chnong ku ki, wei kiwa chong chnong leh u ku ki la toh wa ku ka ri wei lai chakhmat. Iwa mut hap em bait i yatoh wei na itæ i daw ki kyntien im sngi yong ka NCC leh man ko kawa emkaam bha hei im kawa ong “Unity and Discipline”.
Ong haroh u wa i lai chakhmat hei im toh lyngba i yatylli wei i man wa bha.
Neitæ i em ya ka Discipline yarap haroh ko u tip kammon u bhah yei por wa kynthup i por wow puræ wow lehke wei chong-ngiah. Wei i ye u bood ryntih yaka Discipline yarap ko leh u man kiwa jop hei im.
Ha kani ka sngi da yoh laad leh u yaklam wa ki khynnah chah sikai NCC kiwa napoh Jowai kiwa da khana yei daw wa pynman ya ki u kwah psiah NCC toh wa yarap ko ki heiyatoh wa i kreh chipai kreh pulit iwa da angnood ki, najrong wa yohlaad haroh ki u embynta ha ki laad e sikai waphær waphær iwa yarap leh yei im wa man-ka-sngi yong ki.
Discussion about this post