U Montri Rangbah ka Meghalaya, u Conrad K Sangma da pyntip u wa chwa wow e kti yei takit yeiwa jia ha Mukroh cha ka CBI daw hap chwa wow pyndep ya waroh iwa emkaam na waroh ar jylla hadien wa da dep wow chim yei rai ini wa dep.
Da ong u wa yow leh yeini da emkaam ya ka Assam wa Meghalaya wow soi ki yeiwa da yaklam wa da chim rai hadien wa yachem para Montri Rangbah ha ka 30 tarik u Naikhynde wei wow puræ thij pa thij yeiwa da booh ha ka thup yaklam neibhah lada lait iwi i kyntien, uwi u Coma daw kylla lut i yumut waroh iwa da dep yaklam, wei da dep wow leh yeini wei waroh ar ki Montri Rangbah leh da dep ki wow soi ya kani ka “Minutes of the Meeting”.
Da pyntip u wa kattu sah wow lai pyntip cha ka CBI yow chimkti noh ya ka takit wa kiwi de ki chnat ka sorkar pyrdi yow ye u sdang noh yei takit.
U Conrad da pynkynmoo u leh wa ha katai ka yachem da rai leh wow rah chadien ya ki pulit na kiwa boon ki thaw wa em i ya kajia wei deiwa leh yeini daw pynduna ko leh yei kynaad.
Chooh chooh da pyntip u wa dang pteiñ hi u wow yaklam wa u Montri Rangbah ka Assam, u Himanta Biswa Sarma yow lai hiar cha Block I, Khanduli-Psiar wei da hap wow pynslem yeini neidaw wa em ki Election.
Kamtæ da ong u wa manda kut ki Election daw lai cha Khanduli-Psiar wa Block-I wei daw jied ya i thaw wow lai pait.
Kam wow pynkynmoo wa i yaksiat ha Mukroh da jia i ha ka 22-11-22 iwa da jan dap chi snem heiwa da em 6 ngut kiwa yap heiwa 5 ngut toh kiwa chong chnong ka Mukroh katwa uwi won toh uwa Forest Guars ka Assam.
Discussion about this post