Chem u Justice Katakey ya chiboon u mooyong wa dang tih thymme ha East Jaiñtia Hills

Ha ka 18^th Interim Report kawa da pynkhreh da u Justice (Rtd) Brojendra Prasad Katakey kawa man kam chibynta ka mukotuma PIL wa da yaleh ha High Court ka Meghalaya hajrong i tih mooyong pyrchah ya ka aiñ, da chem ya chiboon u mooyong wa dang dep tih ha East Jaiñtia Hills District.

Neiling u Justice Katakey da lai hiar u cha East Jaiñtia Hills District ha uni u bnai cha ka thaaiñ Khliehriat, Kyrhuhkhla wa Lunar wei ha West Jaiñtia Hills da lai cha ka thaaiñ wa em ka kchaaid Phe Phe.

Ha thaaiñ Khliehriat da chem chiboon u mooyong wa da noh ha rood u sarokbah hajan ka Don Bosco College, Byndihati wei da yoo u leh yei chna ya kawi ka Weighbridge hadien kani ka College kawa em boon u mooyong hajan ko kamjooh ki krem mooyong wa dang krehkaam wei da ong u leh wa kani ka Weighbridge toh kawa jngai na u sarokbah.

Chooh chooh da ong u wa nachwa ym em uni u mooyong heini heipor wa chim yukheiñ ya u mooyong wa da dep tih iwa pynyoo wa i tih mooyong pyrchah ya ka aiñ dang pteiñ hi i wei da chem leh ya ki dak chaka kari iwa pynyoo wa da em wa wan pynhaap mooyong ha ini i thaw.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Hawa lai won cha thaaiñ Kyrhuhkhla wa Lunar heiwa da em i kreh wow pynkhai im yaka wah Lukha da ka M/s Trinity International kawa da pyntip wa dang em ki krem mooyong wa dang im hadooh katni, neiliang u Justice Katakey da ong u wa da chem wei da yoo yei mih ka um wa man Acid na ki thaw tih mooyong wa kai cha ki wah hanla ym em i tih mooyong.

Da ong leh wa ki thaw wa yaleh wow pynkhai im ya ka wah toh wa em sa du ki krem mooyong ki wym pu em khang ym em pyndap khyndaw hanla da phah ya ka sorkar wow pynkhreh ko ya ka Mine Closure Plan. Wei hawa yaklam wa kiwa kreh ka M/s Trinity International kiwa da leh ya ini i kaam ha ki le tylli ki thaw da ong ki wa i thong yong ki toh wow pynduna yei man Acid.

Da chem leh wa kiwa boon na kini ki thaw tih mooyong toh ki wym em kær iwa da booh yei maa ya ki paidbah kamjooh leh ki mrad.

Ha kani ka Report da ong wa em kamwa 1000 tylli ki krem mooyong kiwa dang wai, kiwa khlem tymmoh iwa da wanrah yei pteiñ ka um Acid wow kai cha ki wah, wei ka sorkar toh u chimkhia ko ya ini deiwa paan yarap naka CMPDI yow tip kammon u khang noh ya kini ki krem mooyong.

Chooh chooh ha kani ka Report da ong leh wa ha East Jaiñtia Hills District wa na u mooyong wa chah kem (Seized Coal) wa em 25,817 MT, da dep dai lilam oo tangwa kiwa thied ym pu em wan kit ki ya uni u mooyong wei dang sah 8,700 MT u wym pu em dai lilam. Da phah yow DC wow pyndep yeini chwa u kut uni snem.

Ha West Jaiñtia Hills won na u 1,87,000 MT u mooyong wa chah kem, ka High Court da phah dai lilam ko ya 44,872 MT tangwa ym pu leh yeini da ki bor District, heiwa da phah ya u DC wow pyndep u yeini chwa u kut uni u snem.

Ha West Khasi Hills won da pynmih ya ki Auction Notice yow dai lilam ya 1,39,886.43 MT wei da e por hadooh ka 24 tarik uni u bnai yow wan ki bru wow thong ya uni u mooyong wei da phah ya u DC wow pyndep yeini waroh chwa u kut uni u snem.

Ha South West Khasi Hills District da em 30 MT u mooyong wa chah kem tangwa ym pu em dai lilam oo wei heini leh da phah ya u DC wow pyndep u yeini chwa u kut uni u snem.