Da: U Hamjhan H Dkhar, Raliang
Ka Kopati Puja ka lehniam kawa heh dooh hapoh ka Elaka Raliang yong ka Raij Raliang, West Jaiñtia Hills District kawa jooh pynman khlieh-u-snem hadien wa dep ah ya u kba u khoo, wa dep pynlum pynlang na saar pynthor saar i bhin, myntu u snem u man ko ha ka 28, 29 wa 30 tarik uni u bnai (Nov) ha chnong Raliang.
Kamtæ deiwa dap u Thiar u Tyllu da yoh u lehkmen leh sñiawbha da ka Lehniam Kopati Puja dei wow kynmoo u e ngooh ya u Trekirot Kynrad wa da e da chah sñiawbha ya ki khon Ñiaw Yung ki khon Ñiaw Sem u rep u riang u khih u khan hajrong ka snieh ka swoor yong ka Maithawlang ka Maithawbi ha ki tyrpeiñ ki tympha yong ka wa yoh waroh i jait na ka.
Ha kini ki le sngi, haka 29 tarik ka sngi kawa khroo yong ki khon Niamtre wa yoh ki khmat chynrang u e ngooh e dem, u kyrpaad kyrpon ha mynsien yong ki dang step hapoh Khloo Blai Khloo Syiem yong ka Kopati Sahsati hadien wa dadep u kñia u khriam u Wamon Tali, u chaad u ryngkang Pastieh da ki Soo Langdoh San Langdoh.
Hadien neitæ da pteiñ i kbai i chaad i kynhoi chirup ki ksiñ ki meiñ hadooh wa poi ha yung u Wamon wei mar ya poi ha pchem yung da sdang sa i ngooh i dem na ki khynthai waheh wa khyllood khynnah yoh u chait u tram ka yung ka sem.
Mar ya dep i ngooh i dem da ya lai cha Umïurem hei bood lang ki khon kynroo chynrang wow li pynkai ha um ya u Syntu Blai da u Wamon heitæ ngait skem waroh i kjut i chitom i saja, i adnood bichni, u wiar lut ki napoh ka Raij, ka chnong ka thaw wa na ka Elaka hi waroh kawi.
Hadien wa wan neitæ u em sa ka Chaad Niamtre ha Madan Seiñ Raij Chrah-Umphula da ki khon Niamtre na waroh ki dong ki chnat yong ka chnong Raliang wa na chnong Laskeiñ, chnong Nongkynrih wei kamjooh na ki Raij waphær waphær.
Chooh chooh mar ya kut ka chaad Niamtre na madan, u pyndep ki Soo Langdoh, San Langdoh sa ka Chaad Niam Pastieh ha pchem yung yong u Wamon Tali.
Ka Kopati Puja wa suk wa kmen ya phi waroh.
Discussion about this post