Sdang ka 7th Elite Men’s National Boxing Championship ha Shillong

Ka 7th Elite Men’s National Boxing Championship da sdang ya ka ynne ha SAI Indoor Hall, Shillong.

Ha kani ka lympung da yabhah ya ki yalehke ha 13 tylli ki kyrdan kiwa pynman ha ar tylli ki Boxing Ring kawa daw pynkut haka 1 tarik u bnai wow wan wei da pynman ya ka da ka Meghalaya Boxing Association (MBA) waka BFI deiwa kyrchaan poisa ka chnat Sports and Youth Affairs ka sorkar Meghalaya wei da wan wai ya ka da u Secretary General ka Boxing Federation of India (BFI), u Hemanta Kumar Kalita.

Da ya emlang leh u Working President ka Meghalaya State Olympic Association, u John F Kharshiing kam u symbood kongsan, ka Director ka chnat Sports and Youth Affairs, ka Isawanda Laloo IAS, u MSOA General Secretary, u Finely L Pariat, u Assistant Director ka SAI Shillong, u PS Chauhan wa u President ka Assam Boxing Association, u Kamal Goyary.

Ka Isawanda Laloo da klam ko leh chaphang kiwa yakura ka jylla kiwa katni da man kam ki Coach wa kynthup ya u Torak Kharpran waka Roshni Bhusal kiwa da hikai ya kiwa yakura ka ri heiwa da pynup burom leh ya ki.

Waroh da em 398 ngut kiwa yakura na ki 37 tylli ki jylla wa ki Union Territory kamjooh ki Sports Board kiwa da wan wow ya chimbynta.

Kani ka lympung man ko kawa emkaam bha neibhah kiwa jop daw lai chimbynta ki haka National Coaching Camp wei daw jied ya ki yow lai cha Italy yow chimbynta haka Olympic Qualifier.

Ynne ka sngi sdang da em 3 ngut kiwa na kiwa da chimbynta tangwa waroh 3 ngut da rem ki.

U Banjop Nongkhlaw (51-54kg Bantamweight) da rem u dei Knockout ha u Mohammed Bilal uwa na Telangana pyn ha ka 1^st Round, u Balnas Sangma da neh u hadooh wa kut pyrchah ya uwa na Goa, u Nikhil Gaonkar tangwa rem noh u ha kani ka kyrdan 67-71kg Light Middleweight deiwa kheiñ Point. U Justerwell Jyrwa leh i jooh hi haka Middleweight 71-75kg pyrchah ya u Abhishek Shaw uwa na Bengal.

Mynstep ki yalehke u sdang ki heipor 11:00 waje i step.