Ynne ka sngi man ko ka sngi wow sahkynmoo heiwa da ye wow pyndep ya ka lehniam Ku Tyngkong u Pator ka Elaka Jowai, u Raymond Nartiang ha Yung Langdoh ka Raij Chyrmang.
Hei step da mih kiwa kitkaam niam na Jowai nadooh u Dolloi ka Elaka, u Puramon Kynjing, u Pator, ki waheh wasian, kiwa kitkaam ka Seiñraij Jowai nadooh u President, u Hercules Toi, u General Secretary u Arwotki Sumer, kiwa ha-yung u Pator wa kiwi kiwi.
Manda poi ha Lynter (i bynta ka Wah Myntdu) ki khon ka Raij Chyrmang da yang ki ya u Pator wow rah wow bah ya oo cha chiliang ka wah chirup i kbai i kyr’iaw neitæ won da lai sak cha Yung Langdoh ka Raij Chyrmang heiwa da yieñ ki khon ka Raij narood sarok wow pdiang ya u Pator chapoh ka Raij.
Ha Yung Langdoh da pdiang sñiawbha ya u Pator wa ya kiwa synraan ya oo heiwa da kynjrait ya ka um chwa wow psiah cha pchem kani ka yung wa kyntang.
Heini da pynsait kjat sait kjat ya u Pator da Ka Langdoh ka Raij ka Daphahi Joh yeiwa da pyndbood da i ngooh i dem i suit i choor.
Hapoh Yung Langdoh hadien ku Tyngkong u Pator, da e u yaka yuspong ha u Langdoh ka Raij, u Dalammi Joh wa i e yaka muka chirup waka pliang naar ha Ka Langdoh.
Hadien da pyndbood ya i e yutang mar kylliang hapyrdi u Langdoh ka Raij wa u Pator wow man kiwa ya burom markylliang ya u pood u ang ka Raij.
Ha kani ka sngi da emlang leh u Langdoh ka Raij Ialong wa u Langdoh ka Raij Tuber.
I pyndep yaka lehniam Ku Tyngkong toh i bynta wa kongsan bha ya u Pator heiwa da tipmit pura ya oo wei lada em iwon iwon i wit hapyrdi ki Raij namo ki Soo Langdoh toh i kaamram yong oo wow pyndep wei lada ymye won u, toh won u pyntip ya u Dolloi khnang wow leh u yeiwa emkaam.
Kam kani ka lehniam Ku Tyngkong u Pator u pyndep ha Raij Tuber haka 9 Duyatra (Jan) 2024 wa ha Raij Ialong ha ka 17 Duyatra 2024.
Discussion about this post