Ka North Eastern Police Academy (NEPA) da sdang ko ya ka e sikai wa tip kam ka 53rd Basic Course kawa da chna kyrpang neibynta kiwa dang dep chah thung kam ki Deputy Superintendent of Police (DSP) waki Sub-Inspector (SI).
Ya kani da wan wow wai haka 4 tarik uni u bnai ha NEPA Umsaw da u Symbood Montri Rangbah, u Prestone Tynsong uwa man leh kam u Montri ka chnat Pohyung deiwa emlang u Director General of Police Meghalaya, u Dr L.R. Bishnoi, IPS.
U Prestone hawa e yei klam da ban joor u yeiwa emkaam u yoh ki pulit yei sikai wa biang yow ye ki wow leh yei kaamram yong ki deiwa bha wa miat hawa pynkrehkaam yaka aiñ neibhah sñiawsih u yoo manda chah beiñ ki pulit wot hawa da theh lut ki wow leh yei kaam yong ki khlem da pyrkhat ya idæ wa kiwa ha-yung ha-sem yong ki.
Kamtæ da ong u wa ymtoh wow dooh mynsien wei da pynchlur u leh ya ki wow kreh chitom ki yow yoh ki yeiwa bha tam na kani ka chah sikai.
U Prestone da yaroh u leh yaka NEPA kawa dang yoh yaka khusnaam UTKRISHT wei da yei yoh ko leh yei tipmit naka CBC wa NABET deiwa yaroh leh kamjooh ya u Director kani ka chlem e sikai wei kamjooh leh ya kiwa sikai.
Da ong u leh wa emkaam wow puræ yaka aiñ yow pliah chooh chooh ki pulit manda leh ki yei kaam yong ki yow man ki kam kiwa chkeh bha hapoh ka ri.
Neiliang won u Director ka NEPA, u Anurag Agarwal, IPS da e khublei u ya u Symbood Montri Rangbah wa kamjooh ya u DGP deilang wa kiwi yeiwa e kyrchaan ki wei da e mynsien u leh ya kiwa chah sikai deiwa ong wow leh ki katwa ye i bor yow man ki pulit kiwa da bna naam hapoh ka ri.
U Course Director kani ka 53rd Basic Course, u Dr. M.L Zou, Assistant Director (Lecturer) da khana u wa da em waroh 95 ngut kiwa chah sikai heiwa na Meghalaya da em 39 ngut ki SI wa 6 ngut ki DSP, na Manipur da em 8 ngut ki SI wa 14 ngut ki DSP, na Assam 15 ngut ki SI katwa na Nagaland 4 ngut ki SI wa 9 ngut ki DSP. Na kini, 26 ngut toh ki kynthai wa 69 ngut ki chynrang.
Discussion about this post