Uwa yahkhmat ka NPP uwa man leh u MLA warim, u James PK Sangma da ong u wa ka Party da sdang ko wow lai neibynta wow pynsñiawthooh paidbah wei yalap neibynta ka Election MP kawa daw man ha u snem wow wan. Da ong u wa ki phang kiwa boon daw mih ki ha ka yalap Election wei ye u man i dawa pynman Nongbah Tlang ya ka Tura leh ye i wow khai im biang ha kani ka Election MP.
Hawa yatoh waka Tura Praliamentary Constituency, da ong u wa ka kyrtong kawa biang wow yaleh MP katni toh ka Agatha Sangma kawa da lai chaaid chaaid wow yalap, heiwa da kam u leh wa kam ka MP da kreh bha ko wow lehbha leh ha Parliament deiwa rah ya ki phang ym du i yong ka thaaiñ Garo tangwa yong ka jylla waroh kawi.
U James uwa man leh u payu tre ka MP, da ong u wa ka Agatha da chimkhia ko wow pynyoh yei tipmit ya ka ktien Garo kawa rap nachwa ka wym pu yoh leh u em haka thup wa dang yang u yoh yei tipmit, tangwa deiwa yahkhmat ka Agatha ryngkat kiwi kiwa yahkhmat na Garo Hills da ye wow pynsñiaw ya ini wa emkaam hei yachem wa u Home Minister ka sorkar pyrdi.
Hawa yatoh wa ka ktien Khasi, da ong u wa ka ktien Khasi da em chwa ko haka thup wow yoh noh i tipmit, tangwa ym pu yoh yei mynjur neibhah hap wow rah chwa hapoh ka Parliament hachwa wow yoh yei tipmit hapoh ka 8th Schedule.
Hawa yatoh waka Shillong Parliamentary Seat, u James da ong u wa ka Party da sai ko ya ka kyrtong kawa biang bha na Shillong, wei ka Party daw leh ko katwa ye yow yoh yei jop. Da pynsñiaw u yei kyrmen wa ka NPP daw yoh ko yei soh i jop na Shillong leh ha kani ka Election MP.
Discussion about this post