Ka North East Students’ Organisation (NESO) wa kynthup lang yaka Khasi Students’ Union (KSU), ka All Assam Students’ Union (AASU), ka Naga Students’ Federation (NSF), ka Mizo Zirlai Pawl (MZP), ka Twipra Students’ Federation (TSF), ka All Manipur Students’ Union (AMSU), ka Garo Students’ Union (GSU) waka All Arunachal Pradesh Students’ Union (AAPSU) kiwa na ki 7 tylli ki jylla ka thaaiñ North East da pynbna yei yakhih yow pynyoo biang yei pyrchah yaka Citizenship (Amendment) Act 2019.
Neiliang ka NESO da pynkynmoo ko ya waroh kawi ka thaaiñ North East wa ha ka 11-12-19, hanla joor i pyrchah leh da kiwa chong chnong jaitbru ri-loom ka North East kiwa pyrchah yaka Citizenship (Amendment) Bill 2019, ka sorkar India da da pynman aiñ ki yaka hapoh ka Rajya Sabha yow tip noh ya ka kam ka Citizenship (Amendment) Act 2019.
Kamtæ ka NESO da pynbna ko yaka 11 tarik uni u Kmaichonglad kam ka Black Day ya waroh kawi ka North East. Yow pteiñ yeini i kynymoo ya kani ka sngi kam ka Black Day, ka NESO da rai ko wow rah lama yong wa ki Banner rong yong ha ki thaw wa man kyrpang ki 7 tylli ki jylla ha kani ka 11 tarik.
Yeini da leh kam wow phah khubor cha ka sorkar India wa pyrchah yaka Citizenship (Amendment) Act 2019 wei wow pynkynmoo leh ya ki paidbah ya ini wa jia iwa man pyrchah ya kiwa chong chnong ka thaaiñ North East waroh kawi wei ka NESO da khut ko ya waroh wow kynmoo ya kani ka sngi kam ka Black Day.
Discussion about this post