Ka Rotary Club Jowai chirup i yakrehlang waka JNV School Mukhla ha ka Muchai 16 tarik da pynman ki yaka Career Guidance & Counselling Programme heiwa u Sylvester Phanbuh, MCS-EAC, West Jaiñtia Hills da man u kam u kongsan hei sakhilang ki khynnah skur wa kiwa sikai ka JNV School Mukhla.
Ha ka yalang yahkhmat yong kani ka sngi, u Rtn D.F. Majaw da man u kam u Master of Ceremony katwa u Rtn. Deibormi Toi, President Rotary Club, Jowai da man u kam u chongknor yong kani ka yalang kawa da embyntalang leh da ka Rtn. Ester F Gatphoh, Chartered President Rotary Club Jowai, u Rtn. P.Najiar, ka Vandya Srivastava, Vice-Principal, JNV Mukhla, u Rtn. Montri Passah, u Rtn. Samehi Laloo wa u Rtn. Reuveny Nongtdu.
U Rtn. S.K.Lato, Vice-President RC, Jowai hei e ki kyntien yahkhmat da klam pynsñiaw u hapyrdi ki khynnah chaphang ka Rotary International kam kawi na ki seiñ kreh monsñiawbha wa em ha kylleiñ ki ri ka pyrthai neitæ khana batai u leh chaphang ka Rotary Club Jowai wa ki kaam wa da leh ko neibynta i miat i bha wei myntoi ka imlang sahlang yong ki bru wa chong chnong ka District.
U Sylvester Phanbuh hawa e kyntien kam u kongsan yong kani ka sngi da ong u wow ye u kyntu kynrong wei u pynman yaka ri India kam kawi na ki ri wa kaap wa lai chakhmat ha ki liang waphær wei iwa hakhmat emkaam ko u yoh ya ki bru kiwa em i stat, i tip wei chemphang hei wow leh ya ki kaam waphær waphær.
Chooh chooh ong u leh ya ki khynnah skur kynmoo phi toh kiwa embhah wow yoh ya kani ka juk kawa kyrpang tam kawa booh ya ki manbei manpa yong i hei duna i tip i chemphang wow leh yeiwon yeiwon kam wa phi tip phi, kamtæ kam ki khynnah skur chim wow pynemkaam hok yei stat kani ka juk ka por da ka luti wa miat wa bha ymtoh da ka luti wa pynbakla næ pynjæd pynpra yei man yong phi.
Ha kani ka Career Guidance & Counselling Programme da wan e sikai, pynche pynsñiawthooh ya ki khynnah da ki bru stat bru chemphang wa kynthup ya ka Dr. Rica Lamar kawa da batai ya ki khynnah chaphang ka luti wow yoh yei chait i khiah katwa ka Eva Thabah wa ka Badonnam Pyrbot won da klam da batai ki chaphang kammon u man ki khynnah kiwa lait nei wiar nar wiar luti i thij i pyrkhat hadien wa da pyndep yei puræ puthi ha ki kyrdan wa ki rukom waphær.
Discussion about this post