Ka Nongthymmai Cultural and Sports Club Huroi ha ka 21 tarik uni u bnai da yoh ko wow wai paidbah ya u mot sahnaam sahkynmoo ya kiwa seiñ yong kani ka Sports Club ha ka yalang wa da pynman ha madan yalehke ka Club.
Da wan wow sakhilang yeini da ka MLA ka Sutnga-Saipung Constituency, ka Santa Mary Shylla kawa man leh kam ka kongsan ha kani ka sngi wei da yoh yei klam nadooh u Waheh Chnong ka Huroi, u Golden Marbaniang, u Secretary yong ka chnong, u Raja L Suchen, ki bru bnadur ka thaaiñ kam u Daiapherbha Lamare, kiwa yahkhmat kani ka Sports Club wa kiwi kiwi de.
Kam chibynta kani ka sngi da pynman leh ya ka Sports Meet kawa ar sngi kawa da pynman da kani hi ka Sports Club heiwa da em ki yakob phet pyllah, Long Jump wa kiwi de wei da chimbynta chitrhem bha da ki chynrang wa kynthai.
Da em leh ka Football Friendly Match kawa da yakhun hapyrdi ka Hingaria SC waka Youngstar Sports Club Huroi heiwa da jop da ka Youngstar da 1-0.
Ka Santa Mary Shylla hawa e yei klam da ong ko wa u krehlang ko yow wanrah yei kylla hawa yatoh waka chnong wei kamjooh leh wa kani ka Sports Club, da ong ko leh wa yaka Sub-Center kawa em hapoh ka chnong daw lai luti ko wow booddien khnang wow yoh pynku noh cha ka PHC kamjooh u booddien leh ya u sarok Sonapur chadooh Huroi, ka yaaw khappood namo ka Border Haat yow ye u pyndep noh khnang wa ki paidbah kani ka chnong u rap suk ki.
U Golden Marbaniang hawa e yei klam da ong u wa emkaam wow em ka madan yalehke wa biang deilang waka Mini Gallery wei wow kær kynroh leh ya kani ka madan yow ye u pynman ym du ya ki yalehke tangwa wot ki yaseiñ wa heh leh wa kiwi de ki yalang. Da yaroh u leh yaka Sports Club kawa da pynku ya ki kaam yalehke hapoh ka chnong.
Discussion about this post