Hadien wa dep pynkhai im biang yaka War Jaiñtia Student Union (WJSU) da kiwa yahkhmat wa em i yoo jngai yei eh i khoo ka thaaiñ War Jaiñtia, kamtæ ha ka 22 tarik won da pynman yalang ha Amlarem, West Jaiñtia Hills District neibynta u pyrkhat yaki kaam wa toh u lai chakhmat.
Ha kani ka yalang da emlang ki dkhot wa chipor ka Central Executive Committee wa kynthup nadooh u President, u Namdichai Lamare neitæ kiwa e buit ka seiñ wa kiwi de.
Kamwa da ye u pynkhai im biang ya kani ka seiñ wa da rim hapoh ka thaaiñ War Jaiñtia, u President hawa klam ong u lyngba kani ka seiñ em ko yei angnood u wanrah biang yei burom wa da wiar hapoh ka thaaiñ. Deiwa pynrap leh wa nadooh wa sangeh krehkaam kani ka seiñ da yoo yei suki i krehkaam hapoh ka thaaiñ la heiyatoh i roi i paar, ka puræ puthi, ki luti syngkieñ, ki thaw sumaar wa kiwi.
Neiliang u Alban K Gashnga, Chief Adviser da e buit u yaka seiñ wow sdang noh ko u mih chakhmat wow thooh ki laad ki luti neibynta u yaklam waka sorkar yeiwa emkaam wow dawa næ iwa chong hok u yoh ka thaaiñ Amlarem Civil Sub-Division.
Ong u leh wa nadooh wym em de krehkaam ka WJSU ym em kawi wot leh ka yung krehkaam ka sorkar wa da wanrah ha ka thaaiñ Amlarem Civil Sub-Division.
“Ka sorkar wa katni kamjooh kiwa da lai chadien da pynku kyrdan ko ya chiboon tylli ki Civil Sub-Division, i won sñiawthooh i wa hawa ym pu ye u pynku kyrdan yaka Amlarem Civil Sub-Division toh u wanrah won da ki yung krehkaam wa yarap ya ki paidbah ka thaaiñ wei kiwa toh hok u em cha ka thiañ,” da ong u Alban K Gashnga.
Da e u kattu katni ki nongmuna deiwa ong wot hadien wa yoh ya u surok NH-44E (Dawki-Jowai Road), ka yung krehkaam ka National Highway Sub-Division dang neh bait ko ha Jowai hawa toh u wanrah noh cha kani hi ka thaaiñ.
Heiyatoh wa i hiar i puræ puthi ha kani ka juk, ong u i daw toh wa ki bei ki pa ka thaaiñ man ki kiwa dooh wa duk wei jooh ong ki leh ym myntoi u pynlai skur khon neibhah manda heh ym yoh kreh tang ki. Kamtæ heiyatoh wa ini ong u emkaam wow yoh haka thaaiñ Amlarem yaka chnat District Industrial Centre neibynta u kyrchaan ko yaki khon khynroo khyllood wa da stat da tip kamjooh leh ya kitu ki wym em lai puræ yow ye ki u yieñ hei yong ki i kjat.
Pynrap haroh u wa hawa ya kiwi ki Civil Sub-Division boon da pynku kyrdan District iyi u eh yaka sorkar u pynyoh ko kini ki yung krehkaam wa toh hok haka thaaiñ Amlarem neibynta i suk i jan wei myntoi ki paidbah.
Lyngba kini ki yumut ngait skem u wa hapoh i yahkhmat u President daw thooh laad ki u yaklam waka sorkar heiyatoh i puræ puthi leh wot kiwa wan na ki manyung wa dooh leh u yoh lang ki yei tip i stat kamwa yoh kiwi.
Discussion about this post