U Kiang Nangbah ymtoh uwa yaleh pyrchah tangwa uwa yaleh laitlooid: Dr. Wanweiroy Kharlukhi

U Dr. Wanweiroy Kharlukhi, MP Rajya Sabha hawa e yei klam kam u kongsan haka yalang leh warom yaka lyngkhooh snem yap wa 161 u Kiang Nangbah wa da pynman da ka Seiñraij Jowai ha Madan Mynkoi Pyrdi Iongpiah, Jowai ynne ka sngi, da ong wa toh u kynmoo i wa u Kiang Nangbah ymtoh uwa yaleh pyrchah tangwa man u kam uwa yaleh yoh laitlooid.

Da ong u wa ki pharæng hanla da pynkut ki yei mynsien u Kiang Nangbah tangwa i pyrtuid i naam yong oo ym ye ki wow pyndooh. Da ong u leh wym toh u ngait yeiwa sikai ki pharæng kiwa thoh chiliang kiwa da ong wa ini iwa yaleh ki bru Pnar toh iwa yaleh pyrchah (Resistance) tangwa ini toh i yaleh laitlooid iwa da tooh ki pharæng nei kti yong i.

Da khana u wa heipor wa thooh bniah u chaphang u Kiang Nangbah da yoh u napoh ka National Archive wa em ha Bilat yaka kot kawa em pyrtuid Selection from the Records of the Government of Bengal No.39 Part-I kawa da pynmih ha u snem 1863.

Wei kani ka kot toh toh kawa da pynmih hadien wa dep pasi ya u Kiang Nangbah wei da thoh ki yei parom i yaleh hapoh Ri Pnar wei iwa da thoh ha kani ka kot da khana kammon da leh ki yow pyndem ya kini ki khlawait ka ri deiwa pyndooh baam deiwa thang yaka Pynthorneiñ wa Pynthorwah.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha kawi won ka kot wa da thoh da u Dr. J.W. Thorton kawa tip kam ka Memories of Seven Campaign uwa da thoh chaphang i lai lang u kam u Doctor wa ki chipai pharæng, da khana u wa katwon chem chitom ki wow yaleh wa ki bru u Kiang Nangbah neibhah wa stat wa chalak ki heiwa da jia boon sien khlem poi pyrkhat hær ki khnam najrong kiwa da tne ya ki chipai hadooh wa yap wa mynsoo ki.

Kamtæ ki pharæng manda sñiaw ki wym ye de ki wow jop ya kini, da pynemkaam ki da i bor poisa hadooh wa chah chet kylla u Kiang Nangbah.

Da khana u leh wa ha uni u snem wow wan daw yoh u pynlait yaka kot yong oo wa da thooh bniah u chaphang ka Ri-loom Jaiñtia wei sñiaw sarong u wow khana wa ka synchaar paidbah namo ka Democracy ymtoh kawa da chem du da ki Greek tangwa cha i leh i rukom jied Dolloi nachwa leh toh deiwa ya mih paidbah deiwa yieñ ha uwon u Dolloi kwah ki u jied heiwa da niaw katwon ngut kiwa boon yow yoh yei jop.