U MLA ka Sohra Constituency, u Gavin M Mylliem da e jubab u yei chah maham u ha ka HNLC kawa da pynkitkhlieh ha oo yei wym ye de u pynim yaka Mawmluh Cherra Cements Limited (MCCL) wei yei yaklam ka sorkar wow khang noh ya kani ka karkhana pynmih khyndaw-bilat deiwa pynkrehkaam leh da ka Voluntary Retirement Scheme ya kiwa kreh ha kani ka karkhana.
U Gavin da ong u wa iwon iwon i rai wa chim toh deiwa ya mynjur da waroh wa em hapoh ka sorkar wei uwi u bru ym ye u wow chim yei rai, kamtæ wow pynbaad ya oo samen toh i wym yahaap.
Hajrong won i dawa ka HNLC wow ieh noh u yei man kam u MLA, da jubab u wa oo da jied kam u MLA ka Sohra nadooh u snem 2018 wei u pteiñ u wow chakri ya ki paidbah katkam wa da pynkit ha oo da ka aiñ wei oo kam uwa mihkhmat paidbah ym jooh tieñ u ya iyi iyi wei da yoo leh ya ki pynroi wa da wanrah u.
Da pynche u leh wa ka karkhana MCCL toh kawa em hapoh ka Shella Constituency wei ymtoh hapoh Sohra Constituency wei hanla kattæ chimkhia u ya kani ka karkhana neibhah wa em ko boon kiwa kreh kiwa napoh ka Constituency yong oo kamtæ ini waroh da ktah ko ya ka thaaiñ hi waroh kawi wei da klam u leh chaphang ka MCCL hapoh ka Assembly leh kamjooh.
Da ong u leh wa i man ka MCCL kamwa man ko katni toh na ki daw wa boon wei kat u man u kam u MLA ha u 2018, i long i man ko toh iwa da sih bha, kamtæ da ong u wa lada kwah wow kdaw kti toh leh u kylli ya kitu kiwa em yei kitkhlieh nadooh u snem 2007 iwa sdang kani ka karkhana u hiar.
Hajrong ini da ong u wa ini i pynbaad ka HNCL toh iwa yahbakla ya ki paidbah wei pynyoo leh wym tip ki ha kawon ka Constituency em kani ka karkhana wei ini da man ko leh i sien wa nyngkong wa da maham ki ya u MLA iwa da yoo lakam wa da kwah u ki wow embynta ha ki kaam Politics hapoh ka jylla.
Discussion about this post