Ki kyndon namo ki Rules kammon wow pynkrehkaam ya ka aiñ Citizenship (Amendment) Act (CAA) daw pynbna noh da ka sorkar chwa wow pynman ya ka Election MP cha ka Lok Sabha ha uni u snem, da pyntip ka sorkar pyrdi.
Kani ka aiñ kawa da yoh yei mynjur hapoh Parliament da ka Rajya Sabha waka Lok Sabha ha u Kmaichonglad (Dec), 2019 toh yow pynsmat yow man kam ki tre ri ya kiwa man kam ki Hindu, ki Sikh, ki Buddhist, ki Jain, ki Parsi wa Christan lait noh ki Muslim kiwa yut cha India neidaw wa chah thombor ki hei pyrtuid ka niam kam ha ri Pakistan, Afghanistan wa Bangladesh.
Kam wow pynkynmoo wa da mih boon i pyrchah ya kani ka aiñ khamtam ha ki thaaiñ North East ka ri India hadooh ha Delhi tangwa emkaam won ki Rules wow kdaw kammon u krehkaam kani ka aiñ kiwa daw wanrah noh kattu hadien soo snem.
Ka sorkar da pyntip ko wa kini ki kyndon toh kiwa da dep pynkhreh yow pynyoo paidbah noh kamjooh ka Website yow ye ki bru wow yaleh yow yoh noh yei tipmit kam kiwa chong chnong wei yeini ye leh wow leh lyngba ki Mobile Phone yong ki.
Kini kiwa yaleh yow man kam ki tre ri hap ki du wow khana ha uwon u snem psiah ki cha India wei ym emkaam ki wow pynyoo ya ki kot ki sla kammon lai luti ki yow psiah cha India kat hadooh ka 31-12-2014 wei ymtoh hadien ini tangwa da em i klam chawah chaneiñ wa manda wanrah ya kani ka Rules daw pynkylla wei pynyinsur ya kani ka tarik.
Hachwa wow em kani ka aiñ CAA, da em ka Indian Citizen Act 1955 kawa e laad wow man kam ki tre chnong ya ki khian paaid ki wym toh ki Muslim kiwa wan na Pakistan, Bangladesh wa Afghanistan kiwa em du ha ki 9 tylli ki jylla, kitæ ka Gujarat, Rajasthan, Chhattisgarh, Haryana, Punjab, Madhya Pradesh, Uttar Pradesh, Delhi wa Maharashtra heiwa ka Ministry of Home Affairs da pyntip ko wa ha u snem 2021-22 nadooh ka 01-04-21 hadooh ka 31-12-21 da em 1,414 ngut ki wym toh ki Muslim kiwa wan na Pakistan, Bangladesh wa Afghanistan kiwa da pdiang hapoh kani ka aiñ yow man noh kam ki tre chnong ka ri India.
Discussion about this post