Ka Dorbar Chnong Pamrapaithlu lyngba ka kyrwoh wa pynlait da u waheh chnong, u Leningstar Rymbai wa u Secretary chnong, u Lakshmon Siangshai da pynche ki yeiwa em kiwa pynmih khubor heiyatoh wa iwa jia wa chah tynyap ka Lita Ryngkhlem kawa na chnong Wapung Chnong heiwa uwa emkti wow pynkut yei mynsien kani ka manbei toh uwa na chnong Pamrapaithlu uwa tip pyrtuid kam u Monkiru Chyrmang (29 snem).
Hawa yatoh wa ini, da pynman ya ka yachem lang ka Executive Body haka 3 tarik uni u bnai heiwa da pynsakhiat wa uni u Monkiru Chyrmang ymtoh uwa na ka chnong Pamrapaithlu wei ym em hi leh tipmit ya oo da ka chnong wei ym em u leh iyi iyi wow pynsakhiat wa man u kam u tre chnong nadooh i pyrtuid hapoh ka thup kiwa chong chnong, ka EPIC wei ym em pyrtuid u leh kam uwa thap Vote ka chnong.
Kamtæ ka chnong da ong ko wym ye u pdiang yeini wa kam u Monkiru Chyrmang kam u tre chnong wei ym jooh em yoo ya oo leh haka synchaar khadar næ kamwa uwa sah ha kiwon kiwon ki yung neibhah ya waroh ki pyrtuid kiwa chong chnong da dep pynlang yei pyrtuid ki.
Hajrong ini da ong wa i pynmih pyrtuid ya ka chnong khlem da biang ki sabut toh iwa da pynsñiawsih ya kiwa chong chnong neibhah ym em da kynjoh ktien chwa cha u waheh chnong wot da ki bor ka aiñ leh ym em bien ki u pyntikna yei chnong uni u bru.
Ka Dorbar Chnong Pamrapaithlu da maham ko deiwa eh ya ki bru wa chim kabu wow pyndooh burom ya ka chnong lada da ki yung krehkaam ka sorkar, kiwa thoh khubor, ki seiñbhalang næ ki bru samen wa neini chakhamt ymtoh de wow jia kamni wei lada jia daw chim ki laad ki luti wow lai katkam ki bor ka aiñ.
Discussion about this post