Ka lympung yalehbol wa tip kam ka “2nd RYC Bataw Knockout Football Tournament 2023-24” da poi ko cha wakut da ka ykhun Final kawa da pynman haka 6 tarik ha Lacheh Playground Bataw heiwa da wan wow pynhaap pyrda ya kani ka Tournament da u J. Mairom, Additional Superintendent of Police, East Jaiñtia Hills District kam u kongsan deiwa ya emlang kiwa kitkaam ka chnong Bataw kam u Skem Sumer, Waheh Chnong, u Bhalang Suchiang, Chairman Chnong, u Ampli Rupsi, Secretary Chnong uwa man leh u Secretary ka Club, ki bru waheh kiwa da chah khut sñiawbha najrong kiwa yahkhmat wa ki dkhot ka Club.
Yaka yalang da pynlai da u Deihok Sumer, President ka Rumshnong Youth Club Bataw wei da yoh yei klam tbian na u waheh chnong uwa da e mynsien ya kiwa yahkhmat ka Club kiwa da pynman ya kani ka lympung wa heh hapoh chnong wa ha ka thaaiñ hi waroh kawi.
U kongsan hawa e yei klam da yaroh u yaka Rumshnong Youth Club Bataw kawa da ye wow pynman ya kam kani ka lympung yalehbol kawa da man i kyrkhu ya ki khon khynroo kiwa em i sap i tap yow pynmyllien leh yei kaam wa bha yow yoh yei chait i khiah yow lait na ki kaam sih kam i dih muaid kiad, i dih drugs wa kiwi de.
Yaka Final da pynman hapyrdi ka Umsyiem FC Bataw pyrchah yaka War United FC heiwa ka yalehke da man ko kawa yoosuk bha heiwa ki paidbah da yoh ki wow lehkmen smat pyn haka minit wa 3 wa yoh ka Umsyiem u thap kool lyngba u Ejingmut Dkhar tangwa dei leh chitom ka War United da ye ko wow pynuiñ kylla haka minit wa 29 lyngba u Chanlemmiki Khongwang.
Kini ki kool da neh ki hadooh wa kut ka yalehke, kamtæ da pynman da ka yachut Tie-Breaker heiwa ka Umsyiem da jop ko yaka War United da 4-2.
Ka Umsyiem FC Bataw kam ka Champion da yoh leh yaka song poisa kawa Rs. 60,000 deilang waka Trophy katwa ka War United FC kam ka liang wa rem da yoh ko yaka song poisa kawa Rs. 40,000 deilang waka Trophy.
Discussion about this post