Ka President ka ri India, ka Droupadi Murmu ynne haka yalang paidbah wa da pynman ha Mawphlang da booh ko ya ki mooyurim yow chna ya ki thaw sah kiwa uiñke suwari (Rural Tourism Accommodation) ha chnong Khongtong, Mawlyngot wa Kudengrim deilang waka Shillong Peak Ropeway wei da wai ko leh ya ki ar tylli ki sarok wa dang dep chna pynthymme kiwa tip kam ka Rongjeng Mangsang Adokgre Road waka Mairang Ranigodown Azra Road deiwa emlang u Chief Minister, u Conrad K Sangma, ki Deputy Chief Minister, u Prestone Tynsong wa u Sniawbhalang Dhar neitæ ka Minister ka chnat Agriculture, ka Ampareen Lyngdoh wa Minister ka chnat Tourism, u Paul Lyngdoh wa kiwi de.
Ka President hawa e yei klam da pynsñiaw ko yei kmen wow yoh u yachem wa ki jaitbru ri-loom ka Meghalaya deiwa yaroh leh ya ka khloo kyntang wa em ha Mawphlang deiwa yaroh leh yei stat yong ki warim wow pynneh pynsah wei wow yada yaka bei rym-aw.
Da yaroh ko leh yaka jylla Meghalaya yeiwa yaleh ko wow pynneh pynsah yeiwa mahajon ko wei yei kreh chitom wow pynman kam ka Model State kawa man kawa katkam ka juk wa katni khlem da mylliñ yei yong u warim wajah.
Chooh chooh da ong ko sñiawsuk ko wow tip wa yoh ka Meghalaya chiboon ka poisa kawa da poi na baar wei da klam ko leh chaphang ki mar wa da pynmih napoh ka jylla kiwa pawnaam kam u chirmit Lakadong.
Ka President da yoh ko leh wow yoo yei rukom khut khon kiwa chong chnong ka Khongtong heipor wa lai ko cha ka Heritage Village wa em hajan ka khloo kyntang ka Mawphlang.
Discussion about this post