Meghalaya Games: Yoh Takma Ksiar u Renaldi Dhar uwa na West Jaiñtia haka yaphet 100m

Ha ka yakob phet pyllah wa da pynman kam chibynta ka Meghalaya Games 2024 ha Tura, u Renaldi Dhar na West Jaintia Hills da man u uwa smat dooh na ki chynrang yow yoh Takma Ksiar deiwa pyntam ya u Gracewin Ch Marak ka South West Garo Hills da .2 Second katwa ha ki kynthai won ka Angelina Jackson kawa na Shillong da jop suk ko deiwa tam da chiteiñ Second haka yaphet 100 Meter yow yoh Takma Ksiar.

U Renaldi da yoh nyngkong u deiwa phet da 11.4s katwa u Gracewin uwa yoh wa ar da pyndep u heipor wa 11.6s yow yoh Takma Rupa, katwa hei wa le da yoh u Pilo Rongchang uwa na Ri-Bhoi uwa da pyndep heipor wa 11.7s yow yoh Takma Tama. Nadooh uwa yoh nyngkong hadooh uwa yoh hei wa ynru da yaphær i por du chiteiñ Second donhi.

Ka Angelina da pyndep ko heipor 13.6s deiwa pynbood ka Savinity Jyndiang heipor wa 14.2s yow yoh Takma Rupa katwa ka Ibaiahun Kurbah kawa yoh Takma Tama da pyndep ko heijooh i por wa 14.2 wei waroh kiwa poi Final da em ki 6 ngut ha kani ka yaphet pyllah 100 Metre.

Waroh da em 6 tylli ki yalehke wa da pyndep ynne ka sngi nyngkong wa sdang ya ki yalehke Athletics.

Related posts

Super Divison Saipung: Jop ka Narwan wa ka Pyrdung

November 25, 2024

Yoh takma ki ar ngut kiwa na East Jaiñtia ha ka lympung yakhun Karate wa pynman ha New Delhi

November 25, 2024

Ha ki chynrang haka 1500 Metre da yoh nyngkong uwa yalehke ka Ri-Bhoi, u Skhemlang Suba uwa da pyndep heipor wa 4:04:7 yow yoh Takma Ksiar, yaka Takma Rupa da yoh da u Dabit Dkhar na West Jaiñtia Hills uwa da pyndep heipor wa 4:08:9 katwa uwa phet ka West Khasi Hills, u Banjoplang Wanniang da yoh u yaka Takma Tama deiwa pyndep heipor wa 4:09:0.

Ha ka 1500 Metre ki kynthai da yoh Takma Ksiar ka East Khasi Hills lyngba ka Glorify Kurbah kawa da pyndep heipor wa 5:04:1, yei Takma Rupa da yoh ka Daphlin Wahlang kawa na SWKH kawa pyndep heipor wa 5:13:5 katwa ka Balasiewdor Pathaw kawa SWKH hi da yoh Takma Tama ko deiwa pyndep heipor wa 5:20:3.

Ha ka Men’s High Jump, u Primus Ronghi na Ri-Bhoi uwa kynthih 1.90 Meter da yoh Takma Ksiar, uwa yalehke uwa na Williamnagar, u Pringchang N Sangma da yoh Takma Rupa u deiwa kynthih 1.85 Meter katwa yaka Takma Tama da lai ko cha u Simeon Marak uwa na North Garo Hills uwa da kynthih 1.85 Meter.

Ha ka Women’s High Jump won, da lehbha kiwa yalehke ka Ri-Bhoi kiwa da yoh Takma Ksiar wa Takma Rupa heiwa ka Rinalgi Ingti da kynthi ko 1.55 Meter katwa ka Andrisha Klien da kynthih ko 1.45 Meter wei ka Roshni Ch Marak kawa na Williamnagar da yoh Takma Tama ko deiwa kynthih 1.35 Meter.

Ha kiwi won ki yalehke, ka Ri-Bhoi da yoh ko sa 3 tylli ki Takma Ksiar, kawi ka Takma Rupa wa kawi ka Takma Tama, da pynbood da kiwa yalehke ka East Khasi Hills kiwa yoh sa ar tylli ki Takma Ksiar katwa ka WJH da yoh ko sa kawi ka Takma Ksiar.